પંજાબના ગુરદાસપુરમાં ફરી એકવાર પાકિસ્તાનના ડ્રોન ષડયંત્રને નિષ્ફળ બનાવી દીધું છે. BSFના જવાનોએ પંજાબના ગુરદાસપુરમાં ભારતીય સીમામાં ઘૂસેલા પાકિસ્તાની ડ્રોન પર ગોળીબાર કર્યો અને તેનો પીછો કર્યો. સર્ચ દરમિયાન, જવાનોએ ડ્રોનથી મોકલેલા ઘણા હથિયારો પણ મળી આવ્યા હતા. આ જાણકારી BSF દ્વારા આપવામાં આવી છે.
બીએસએફના પ્રવક્તાએ જણાવ્યું કે 17/18 જાન્યુઆરીની મધ્યરાત્રિએ, પંજાબના ગુરદાસપુર જિલ્લાના ઉંચા ટકલા ગામની સીમમાં તૈનાત બીએસએફની ટીમે પાકિસ્તાનથી આવતા એક શંકાસ્પદ ડ્રોનનો અવાજ સાંભળ્યો. બીએસએફની ટીમે ઝડપી કાર્યવાહી કરતા શંકાસ્પદ ડ્રોનના અવાજની દિશામાં ગોળીબાર કર્યો હતો. ફાયરિંગ દરમિયાન જવાનોને નજીકના વિસ્તારમાં કંઈક પડવાનો અવાજ પણ સંભળાયો.
ખેતરમાં પડેલું પેકેટ મળ્યું
BSFએ જણાવ્યું કે સમગ્ર વિસ્તારની પ્રારંભિક શોધ દરમિયાન જવાનોને ગુરદાસપુરની બહારના વિસ્તારમાં એક પેકેટ પડેલું મળ્યું. આ પેકેટ ખોલતા તેમાંથી 4 પિસ્તોલ (મેડ ઇન ચાઇના), 8 મેગેઝીન અને 47 રાઉન્ડ મળી આવ્યા હતા. હાલ સમગ્ર વિસ્તારમાં સર્ચ ઓપરેશન ચાલુ છે.
એક અધિકારીએ જણાવ્યું કે એલર્ટ બીએસએફના જવાનોએ ફરી એકવાર ડ્રોન દ્વારા ડ્રગ્સ અને હથિયારોની દાણચોરી કરવાની દાણચોરોની નાપાક યોજનાને નિષ્ફળ બનાવી દીધી છે. જણાવી દઈએ કે નવા વર્ષથી અત્યાર સુધીમાં ગુરદાસપુરમાં પાકિસ્તાની ડ્રોનની ગતિવિધિ 6 વખત જોવા મળી છે.