ડિજીટલ ટેક્નોલોજીની પહોંચ હજુ પણ માત્ર પુરુષ, શહેરી વિસ્તાર, ઉચ્ચ જ્ઞાતિ અને ઉચ્ચ વર્ગના ઘરો તેમજ લોકો સુધી જ મર્યાદિત છે. મોબાઇલ ફોન ધરાવતા પુરુષોની સંખ્યા 61% જ્યારે માત્ર 31% મહિલાઓ જ મોબાઇલ ફોન ધરાવે છે. ઑક્સફેમ ઇન્ડિયા દ્વારા જારી ‘ઇન્ડિયા ઇનઇક્વિલિટી રિપોર્ટ 2022: ડિજીટલ ડિવાઇડ’ના રિપોર્ટમાં આ ખુલાસો થયો છે.
આ રિપોર્ટમાં વર્ષ 2021ના આંકડાઓ પરથી દાવો કરવામાં આવ્યો છે. કે દેશમાં જાતિ, ધર્મ, લિંગ, વર્ગ અને ભૌગોલિક આધાર પર વધતી અસમાનતાનો વ્યાપ પણ વધી રહ્યો છે. જે ખાસ કરીને ડિજીટલ સ્પેસમાં ચિંતાજનક રીતે જોવા મળી રહ્યો છે. રિપોર્ટ અનુસાર, સામાન્ય જાતિના 8% લોકો પાસે કમ્પ્યૂટર અથવા લેપટોપ છે. જ્યારે અનુસૂચિત જનજાતિ (એસટી) ના 1%થી પણ ઓછા લોકો પાસે તેમજ અનુસૂચિત જાતિ (એસસી)ના 2% પાસે જ કમ્પ્યુટર અથવા લેપટોપ છે. GSMAના મોબાઇલ જેન્ડર ગેપ રિપોર્ટ અનુસાર 2021માં મોબાઇલ ઇન્ટરનેટનો ઉપયોગ કરનારી મહિલાઓની સંભાવના પુરુષો કરતાં 33% ઓછી હતી.
રિપોર્ટમાં ઓક્સફેમ ઇન્ડિયાએ જાન્યુઆરી-18 થી ડિસેમ્બર-21ના સમયગાળા માટે ખાનગી થિંક ટેંક સીએમઆઇઇના સ્થાનિક સરવેના પ્રાઇમરી ડેટાનું વિશ્લેષણ કર્યું છે. તેમાં ઇન્ટરનેટની પહોંચ, કમ્પ્યુટર અને બ્રોડબેન્ડની ઉપલબ્ધતાના આંકડાઓ સામેલ છે. વિશ્લેષણમાં નેશનલ સેમ્પલ સરવે (એનએસએસ)ના આંકડાઓને પણ આવરી લેવાયા છે. રિપોર્ટ અનુસાર જ્યાં 95% પગાર મેળવતા સ્થાયી કામદારો પાસે મોબાઇલ ફોન છે, ત્યારે માત્ર 50% બેરોજગારો પાસે જ ફોન છે. સામાન્યપણે ધારણા છે કે વિપરીત, ગ્રામ્ય વિસ્તારમાં કમ્પ્યુટર ઉપકરણોના ઉપયોગમાં ઘટાડો થયો છે. મહામારીથી પહેલા, માત્ર 3% ગ્રામ્ય વિસ્તારના લોકો પાસે કમ્પ્યુટર હતું. મહામારી બાદ આ ટકાવારી ઘટીને હવે માત્ર 1 ટકા છે. જ્યારે શહેરી વિસ્તારોમાં કમ્પ્યુટર ધરાવતા લોકોની સંખ્યા 8 ટકા છે. શિક્ષણ તેમજ સ્વાસ્થ્ય જેવી આવશ્યક સેવાઓ પ્રદાન કરવામાં ડિજીટલ ટેક્નોલોજીનો ઉપયોગ પણ દેશમાં ડિજીટલ ડિવાઇડ અને તેના પરિણામોને દર્શાવે છે.