પાટણ તાલુકાના ખારી વાવડી ગામના પાટિયા પાસે ખેતરમાં નિંદામણની મજૂરી કરતી બહેનોએ જણાવ્યું કે અત્યારે સવારમાં મજૂરી કરવાની અને બપોર પછી મત આપીશું. આજકાલ મોંઘવારી બહુ નડે છે એટલે મત આપવાની ઇચ્છા થતી નથી પરંતુ સારું થાય (વિકાસ થાય)એટલે માટે અને ધરમ સમજીને મત આપીશું.
સોમવારે વિધાનસભા ચૂંટણી માટે મતદાન ચાલી રહ્યું હતું અને સવારે સવારે મતદાન કરવા માટે અપીલ કરવામાં આવી હતી. પાટણમાં જાહેર સભા સંબોધતા વડાપ્રધાન નરેન્દ્ર મોદીએ પણ સવારના ગાળામાં બધા કામો પડતા મૂકીને પહેલા મતદાન કરવા સૌને અપીલ કરી હતી. બહેનોને સવારના બધા કામોમાંથી મતદાન માટે છુટ્ટી આપવા ભાઈઓને આગ્રહ પૂર્વક કહ્યું હતું.
જો કે, પાટણ તાલુકાના ખારી વાવડી, કુણઘેર, અડિયા રોડ ઉપર આવેલા ખેતરોમાં ખેડૂત મજૂરોની અવરજવર અને કામગીરી ચાલુ હતી. અડિયા અને કુણઘેર ગામે ખેત મજૂરોએ મતદાન કરી આવ્યા હોવાનું જણાવ્યું હતું. જ્યારે ખારી વાવડી ગામે ખેતરમાં કામ કરી રહેલી મહિલાઓએ જણાવ્યું હતું કે પહેલા કામ કરી લઈશું અને બપોર પછી મતદાન આપીશું.
તેમણે કહ્યું કે ખેતીમાં સારું છે પણ મોંઘવારી છે એટલે વધતું કંઈ નથી. વિકાસ થાય તે સૌને ગમે. અમને પણ ગમે. પણ હાડમારી તો હાડમારી જ રહે. તમે વિકાસ માટે મત આપશો કે પરિવર્તન માટે તેમ પૂછતાં તેમણે સામો સવાલ કર્યો કે તમે કોણ ભાજપવાળા છો કે કોંગ્રેસવાળા. છાપાવાળા હોવાનું કહેતાં તેમણે કહ્યું કે મતદાન કાયમ કરીએ છીએ. આ વખતે પણ કરશું. બપોર પછી ઘરના કામ પૂરા થયા પછી મત આપવા જઈશું. અમારા ખેતરમાં નીંદામણ કાઢવું અમારા માટે વધારે જરૂરી છે .કામ પહેલા પછી બીજું બધું.