ભારતે પ્રથમ અનઓફિશિયલ વૉર્મઅપ મેચમાં વેસ્ટર્ન ઓસ્ટ્રેલિયાને 13 રને હરાવ્યું હતું. ભારત તરફથી સૂર્યકુમાર યાદવ પછી બોલિંગમાં અર્શદીપ સિંહ અને ભૂવનેશ્વર કુમારે સારૂ પ્રદર્શન કર્યુ હતુ. ભારતે પ્રથમ બેટિંગ કરતા 20 ઓવરમાં 6 વિકેટ ગુમાવીને 158 રન બનાવ્યા હતા. જવાબમાં વેસ્ટર્ન ઓસ્ટ્રેલિયા 20 ઓવરમા 8 વિકેટ ગુમાવીને 145 રન જ બનાવી શકી હતી.
ભારતે ટોસ જીતીને પ્રથમ બેટિંગ કરવાનો નિર્ણય કર્યો હતો. ભારત તરફથી કેપ્ટન રોહિત શર્મા અને રિષભ પંત ઓપનિંગમાં આવ્યા હતા. ભારતની શરૂઆત સારી રહી નહતી અને રોહિત શર્મા માત્ર 3 રન બનાવીને આઉટ થયો હતો. તે પછી રિષભ પંત પણ 17 બોલમાં 9 રન બનાવીને આઉટ થયો હતો. દીપક હુડ્ડાએ 22 રન બનાવ્યા હતા જ્યારે હાર્દિક પંડ્યાએ 27 રનની ઇનિંગ રમી હતી.
ભારત તરફથી સૂર્યકુમાર યાદવે ફરી એક વખત આક્રમક રમત રમી હતી. સૂર્યકુમાર યાદવે 35 બોલમાં 52 રન બનાવ્યા હતા. જેમાં 3 ફોર અને 3 સિક્સર ફટકારી હતી.
જવાબમાં ભારતે આપેલા પડકારનો પીછો કરતા વેસ્ટર્ન ઓસ્ટ્રેલિયાની શરૂઆત સારી રહી નહતી. અર્શદીપ સિંહ અને ભૂવનેશ્વર કુમારે વેસ્ટર્ન ઓસ્ટ્રેલિયાના ટોપ ઓર્ડરની કમર તોડી નાખી હતી. માત્ર 3 ઓવરમાં જ વેસ્ટર્ન ઓસ્ટ્રેલિયાની 11 રનમાં 4 વિકેટ પડી ગઇ હતી. વેસ્ટર્ન ઓસ્ટ્રે્લિયાનો સ્કોર 13 ઓવરમાં 82 રનમાં પાંચ વિકેટ થઇ ગયો હતો. વેસ્ટર્ન ઓસ્ટ્રેલિયા તરફથી ફેનીંગે સૌથી વધુ 58 રન બનાવ્યા હતા. ભારત તરફથી અર્શદીપ સિંહે સૌથી વધુ 3 વિકેટ જ્યારે ભૂવનેશ્વર કુમારે 2 વિકેટ ઝડપી હતી. આ સિવાય યુઝવેન્દ્ર ચહલ અને હર્ષલ પટેલને 1-1 સફળતા મળી હતી. હવે વેસ્ટર્ન ઓસ્ટ્રેલિયા સામે બીજી અનઓફિશિયલ વોર્મ અપ મેચ 12 ઓક્ટોબરે રમાશે. તે પછી ભારત આઇસીસી વોર્મ અપ મેચ ઓસ્ટ્રેલિયા અને ન્યૂઝીલેન્ડ સામે પણ રમવાનું છે.
