દક્ષિણ આફ્રિકા વિરૂદ્ધ રમાયેલી પ્રથમ ટી-20 મેચમાં ભારતે 8 વિકેટે જીત મેળવી છે. તિરૂવનંતપુરમમાં રમાયેલી આ મેચમાં દક્ષિણ આફ્રિકાએ પ્રથમ બેટિંગ કરતા 106 રન બનાવ્યા હતા, જવાબમાં સૂર્યકુમાર યાદવ અને કેએલ રાહુલની શાનદાર બેટિંગના દમ પર ભારતે 20 બોલ બાકી રહેતા આ મેચને જીતી લીધી હતી. 3 મેચની ટી-20 સીરિઝમાં ભારત 1-0થી આગળ થઇ ગયુ છે.
સ્કોરબોર્ડ
ભારત: 106/8 (20 ઓવર)
દક્ષિણ આફ્રિકા: 110/2 (16.4 ઓવર)
107 રનના પડકારનો પીછો કરવા ઉતરેલી ભારતની શરૂઆત ખરાબ રહી હતી, કેપ્ટન રોહિત શર્મા 0 રન પર આઉટ થયો હતો. જ્યારે વિરાટ કોહલી માત્ર 3 રન જ બનાવી શક્યો હતો. તે બાદ કેએલ રાહુલ અને સૂર્યકુમાર યાદવે મેચ પલટી નાખી હતી, બન્નેએ મુશ્કેલ પિચ પર ધમાકેદાર બેટિંગ કરી હતી.
સૂર્યકુમાર યાદવે 33 બોલમાં 50 રન બનાવ્યા હતા જેમાં 5 ફોર અને 3 સિક્સર ફટકારી હતી. બીજી તરફ કેએલ રાહુલે 56 બોલમાં 51 રનની ઇનિંગ રમી હતી. રાહુલે 2 ફોર અને 4 સિક્સર ફટકારી હતી. આ મેદાન પર મુશ્કેલ પિચ હતી. એવામાં બેટિંગ કરવી આસાન નહતી, છતા પણ બન્ને બેટ્સમેનોએ અણનમ 93 રનની પાર્ટનરશિપ કરી હતી અને ભારતને જીત અપાવી હતી.
દક્ષિણ આફ્રિકાની ઇનિંગ
ટીમ ઇન્ડિયાના બોલર્સે આ મેચમાં ઐતિહાસિક શરૂઆત કરી હતી. માત્ર 9 રનના સ્કોર પર દક્ષિણ આફ્રિકાની અડધી ટીમ આઉટ થઇ ગઇ હતી. ભારતના અર્શદીપ સિંહ અને દીપક ચહરે શરૂઆતની 3 ઓવરમાં જ દક્ષિણ આફ્રિકાને ઝટકા આપ્યા હતા, જે બાદ પુરી ટીમ તેમાંથી બહાર આવી શકી નહતી.
અંતમાં દક્ષિણ આફ્રિકાના બેટ્સમેનોએ લાજ રાખી હતી અને સમ્માનજનક સ્કોર સુધી ટીમને પહોચાડી હતી. એડન માર્કરમે 25, વેન પાર્નેલે 24 અને અંતમાં કેશવ મહારાજે 41 રનની ઇનિંગ રમી હતી જેને કારણે દક્ષિણ આફ્રિકાનો સ્કોર 106 રન સુધી પહોચી શક્યો હતો.
ભારત તરફથી આ મેચમાં અર્શદીપ સિંહે 3, દીપક ચહરે 2 અને હર્ષલ પટેલને 2 સફળતા મળી હતી.
