દેશની એક લોકસભા અને ચાર વિધાનસભા બેઠકો પર યોજાયેલી પેટા ચૂંટણીમાં ચાર બેઠકના પરિણામ જાહેર થઇ ગયા છે. ચારેય રાજ્યમાં ભાજપના ઉમેદવારોએ હારનો સામનો કરવો પડ્યો છે. પશ્ચિમ બંગાળના આસનસોલ લોકસભા બેઠક પરથી શત્રુઘ્ન સિન્હા અને બાલીગંજ વિધાનસભા બેઠક પરથી બાબુલ સુપ્રિયોની જીત થઇ છે.
બિહારની બોચહા બેઠક પરથી રાજદના ઉમેદવાર અમર પાસવાને જીત મેળવી છે. મહારાષ્ટ્રના કોલ્હાપુર ઉત્તરી વિધાનસભા બેઠક પરથી કોંગ્રેસના ઉમેદવાર જયશ્રી જાધવને 18 હજાર મતે જીત મળી છે. છત્તીસગઢની ખૈરાગઢ વિધાનસભા બેઠક પર મતગણતરી ચાલુ છે. મહત્વપૂર્ણ છે કે ચાર રાજ્યની 5 બેઠક પર યોજાયેલી પેટા ચૂંટણી માટે 12 એપ્રિલે મતદાન થયુ હતુ.
પશ્ચિમ બંગાળની બાલીગંજ વિધાનસભા બેઠક પરથી બાબુલ સુપ્રિયોએ 20 હજાર મતના અંતરથી જીત મેળવી છે. બાબુલ સુપ્રિયોએ ભાજપના ઉમેદવાર કેયા ઘોષને હરાવ્યા છે. આસનસોલ લોકસભા બેઠક પરથી શત્રુઘ્ન સિન્હાએ એક લાખ કરતા વધારે મતથી ભાજપના ઉમેદવાર અગ્નિમિત્રા પૉલને હરાવ્યા છે.
આરજેડીના અમર પાસવાને બિહારમાં બોચહાં વિધાનસભા બેઠક જીતી લીધી છે, તેમણે ભાજપના ઉમેદવાર બેબી કુમારીને 36,653 મતના અંતરથી હરાવ્યા છે. ચૂંટણી પંચ અધિકારીએ તેની જાણકારી આપી છે.
મહારાષ્ટ્રના કોલ્હાપુર ઉત્તરમાં ભાજપ હાર્યુ
મહારાષ્ટ્રમાં સત્તા પર રહેલી મહા વિકાસ અઘાડીની સહયોગી પાર્ટી કોંગ્રેસના ઉમેદવાર જયશ્રી જાધવને કોલ્હાપુર ઉત્તર વિધાનસભા બેઠક પર યોજાયેલી પેટા ચૂંટણીમાં ભાજપના ઉમેદવાર સત્યજીત કદમને 18,000થી વધુ મતના અંતરથી હરાવ્યા છે.