આગામી તા.૧૯ ડિસે.-રવિવારના રોજ સુરત જિલ્લામાં યોજાનારી ગ્રામ પંચાયતની ચૂંટણીના મહાસંગ્રામમાં ૯ તાલુકાની ૪૦૭ બેઠકોમાંથી ૧૬ બેઠકો બિનહરીફ થઈ છે. જ્યારે ૩૯૧ બેઠકો ૧૯ ડિસે. નાં રોજ મતદારો પોતાના પસંદગીના ઉમેદવારને ચૂંટશે. ૪,૦૬,૧૧૦ પુરૂષો અને ૩,૯૪,૨૦૫ મહિલાઓ અને અન્ય ૭ એમ કુલ ૮,૦૦,૩૨૨ મતદારો મત આપી ૨,૫૩૯ વોર્ડના સભ્યોનું ભવિષ્ય નક્કી કરશે. સુરત જિલ્લામાં મતદાનની પ્રક્રિયા સુવ્યવસ્થા સાથે જળવાઈ રહે તે માટે ૯૪૯ મતદાન મથકો પર ૧૦૨ ચૂંટણી અધિકારીઓ, ૫,૧૭૨ પોલિંગ સ્ટાફ અને ૧,૬૫૯ પોલીસ સ્ટાફ ફરજ બજાવશે. ઉપરાંત, સુરત જિલ્લાની ગ્રામ પંચાયતની ચૂંટણીને લઈ કુલ ૯૪૯ મતદાન મથકો તૈયાર કરાયા છે. જેમાં ઓલપાડમાં ૩૦, માંડવીમાં ૧૦, માંગરોલમાં ૪૧ અને ઉમરપાડામાં ૧૩ એમ કુલ ૯૪ મતદાન મથકો અતિસંવેદનશીલ અને ચોર્યાસીમાં ૨૮, ઓલપાડમાં ૫૨, કામરેજમાં ૧૫, પલસાણામાં ૨૬, બારડોલીમાં ૩૭, મહુવામાં ૧૫, માંડવીમાં ૨૩, માંગરોળમાં ૩૩, ઉમરપાડામાં ૩૮ એમ કુલ ૨૬૭ સંવેદનશીલ તથા ચોર્યાસીમાં ૨૪, ઓલપાડમાં ૫૭, કામરેજમાં ૧૧૮, પલસાણામાં ૪૩, બારડોલીમાં ૬૭, મહુવામાં ૯૮, માંડવીમાં ૧૧૨, માંગરોળમાં ૪૬ અને ઉમરપાડામાં ૨૩ એમ કુલ ૫૮૮ સામાન્ય મતદાન મથકો તરીકે જાહેર કરવામાં આવ્યા છે. જ્યારે ચોર્યાસી, કામરેજ, પલસાણા, બારડોલી અને મહુવા તાલુકામાં એક પણ અતિસંવેદનશીલ મથક નથી. કોરોના સંક્રમણની રોકથામ માટે સત્તાવાર ગાઈડલાઈન્સ મુજબ મતદાન મથક પર હેન્ડ ગ્લોવ્ઝ, માસ્ક, સેનિટાઈઝર સહિતની વસ્તુઓ સાથે આરોગ્યકર્મીઓ ઉપસ્થિત રહેશે. જિલ્લા ચૂંટણી અધિકારીશ્રી આયુષ ઓકના માર્ગદર્શન હેઠળ ચૂંટણીની તૈયારીઓને આખરી ઓપ અપાઈ રહ્યો છે.
