સુરતથી વિચલિત કરે એવી ઘટના સામે આવી છે. સુરતના પાલ વિસ્તારમાં માત્ર 7 વર્ષના બાળકનું સ્કૂલ બસની અડફેટે આવતા મોત થયું છે. બાળક માતા સાથે રોડ ક્રોસ કરી રહ્યું હતું. દરમિયાન એક સ્કૂલ બસની અડફેટે આવતા બાળકને માથાના ભાગે ગંભીર ઇજાઓ થઈ હતી. હોસ્પિટલમાં સારવાર દરમિયાન તેનું મોત નીપજ્યું હતું. આ મામલે પોલીસે બસ ડ્રાઇવ સામે ગુનો નોંધી આગળ કાર્યવાહી હાથ ધરી છે.
મળતી માહિતી મુજબ, સુરતના પાલ ગામથી ભેસાણ તરફ જઈ રહેલ ન્યુ ગૌરવ પથ રોડ વિસ્તારમાં શમશાદ આલમ રઝાક તેના 7 વર્ષના બાળક અબ્દુલ રઝાક અને પત્ની સાથે રહે છે અને છૂટક મજૂરી કરીને પરિવારનું ગુજરાન ચલાવે છે. હાલ શમશાદ રઝાક ન્યુ ગૌરવપથ રોડ પર ચાલી રહેલી એક બાંધકામ સાઈટમાં કામ કરે છે. દરમિયાન તેમનો પુત્ર અબ્દુલ રઝાક માતા સાથે હતો અને રોડ ક્રોસ કરી રહ્યો હતો. જોકે માતા આગળ નીકળી જતા બાળક પાછળ રહી ગયું હતું. ત્યારે એક ખાનગી સ્કૂલ બસચાલકે બાળકને અડફેટે લેતા તે નીચે પટકાયું હતું અને તેને માથાના ભાગે ગંભીર ઇજાઓ થઈ હતી. જો કે, સ્થાનિક લોકોએ ભેગા થઈ બાળકને નજીકની હોસ્પિટલ લઈ ગયા હતા.
પરિવારે ફરિયાદ કરવાનો ઇનકાર કર્યો
હોસ્ટિપલમાં સારવાર દરમિયાન બાળકની મોત નીપજ્યું હતું. આ ઘટનાની જાણ પોલીસને કરવામાં આવતા પાલ ગામની પોલીસ હોસ્પિટલ પહોંચી હતી અને તપાસ હાથ ધરી હતી. જોકે પહેલા પરિવાર ફરિયાદ નોંધાવવા માટે તૈયાર નહોતો, પરંતુ બાળકના મોત બાદ પોલીસે પરિવારને ફરિયાદ નોંધાવવાનું કહેતા પરિવારે ફરિયાદ કરવાની ત્યારે પણ ના પાડી હતી. આથી પોલીસે અકસ્માતે મોતનો ગુનો નોંધી બસ ડ્રાઇવરની અટક કરી આગળની કાર્યવાહી હાથ ધરી છે.