ઓક્ટોબરની શરૂઆત સાથે જ દેશમાં કોરોના વાયરસના કેસમાં સતત ઉતાર-ચઢાવ જોવા મળી રહ્યો છે. દેશમાં ફરી એકવાર કોરોનાના કેસમાં ઉછાળો આવ્યો છે. છેલ્લા 24 કલાકમાં કોરોના વાયરસના અઢી હજારથી વધુ કેસ નોંધાયા છે. કેન્દ્રીય સ્વાસ્થ્ય મંત્રાલય દ્વારા જાહેર કરવામાં આવેલા આંકડા અનુસાર, ભારતમાં છેલ્લા 24 કલાકમાં 2,797 નવા કેસ નોંધાયા છે અને 3,884 લોકો સાજા થયા છે.
સક્રિય કેસોમાં ઘટાડો
કેન્દ્રીય સ્વાસ્થ્ય મંત્રાલયે કહ્યું કે દેશમાં કોરોનાના સક્રિય કેસોની સંખ્યામાં પણ ઘટાડો થયો છે. એક દિવસ પહેલાની સરખામણીમાં આજે સક્રિય કેસ 29,251 છે. એક દિવસ પહેલા સુધી, 30,362 સક્રિય કેસ હતા. દેશમાં દૈનિક પોઝિટિવિટી રેટ 1.05 ટકા છે.
24 કલાકમાં ફરી કોરોનાના કેસમાં વધારો
જણાવી દઈએ કે એક દિવસ પહેલા દેશમાં કોરોનાના 1,997 કેસ જોવા મળ્યા હતા. જ્યારે આજે આ આંકડો વધીને 2,797 થઈ ગયો છે. ગઈકાલની સરખામણીમાં નવા સંક્રમિત દર્દીઓની દૈનિક સંખ્યામાં 800 કેસનો વધારો થયો છે. આ સાથે દેશમાં પાંચ લાખથી વધુ લોકોના મોત થયા છે. દેશમાં 5 લાખ 26 હજાર 778 લોકોએ જીવ ગુમાવ્યા છે.
રસીકરણ અભિયાન 219 કરોડની નજીક પહોંચ્યું
આ સિવાય દેશમાં ચાર કરોડ 40 લાખ 51 હજાર 228 લોકો કોરોના રોગચાળામાંથી સાજા થયા છે. દેશમાં કોરોના રસીકરણ અભિયાન પણ ઝડપથી આગળ વધી રહ્યું છે. દેશમાં અત્યાર સુધીમાં 218 કરોડથી વધુ લોકોને રસી આપવામાં આવી છે. અત્યાર સુધીમાં રસીના 218 કરોડ 93 લાખ 14 હજાર 422 ડોઝ આપવામાં આવ્યા છે. ટૂંક સમયમાં આ આંકડો 219 કરોડના આંકડાને સ્પર્શી જશે.
