ભૂતપૂર્વ કેન્દ્રીય મંત્રી અને ભાજપના વરિષ્ઠ નેતા મુખ્તાર અબ્બાસ નકવીએ જમિયત ઉલેમા-એ-હિંદના પ્રમુખ મૌલાના મહમૂદ અસદ મદનીના તાજેતરના નિવેદનો પર તીખી ટિપ્પણી કરી છે. નકવીએ કહ્યું કે સમયાંતરે સાંપ્રદાયિક ભ્રમનું વાતાવરણ ઉભું કરવાનો પ્રયાસ કરવાની કેટલાક લોકોની આદત છે. તેમણે કહ્યું કે વિશ્વના દર 10માંથી એક મુસ્લિમ ભારતમાં રહે છે, અને સમાજના તમામ વર્ગો સાથે સમાન રીતે પ્રગતિમાં ભાગ લઈ રહ્યો છે.
‘પહેલા પોતાની જાતને સુધારે મદની’
મુખ્તાર અબ્બાસ નકવીએ વધુમાં કહ્યું કે સમસ્યા એ છે કે મોદીજીએ વોટની ઠેકેદારી બંધ કરી દીધી છે. તેમણે કહ્યું કે, ‘હવે વોટની ઠેકેદારી પીટાઈ ગઈ છે, સર્વસમાવેશક વિકાસને પ્રાથમિકતા આપવામાં આવી રહી છે. ભારતની સંસ્કૃતિ, મૂલ્યો, સંકલ્પ વિશ્વમાં સૌથી મજબૂત છે. જો ઇસ્લામોફોબિયા હોત તો ભારતીય મુસ્લિમ સફળતા, સલામતી, સમૃદ્ધિ સાથે જીવતો ન હોત. યુવાનોને ફસાવવાની બાબતમાં સૌ પ્રથમ મદનીએ પોતાની જાતને સુધારવી જોઈએ. જે પણ હુલ્લડ કરશે તેના પર કાર્યવાહી કરવામાં આવશે, તેને સાંપ્રદાયિક અથવા જાતિના દૃષ્ટિકોણથી જોવું યોગ્ય નથી.’
મૌલાના મદનીએ શું કહ્યું હતું?
મદનીએ શુક્રવારે કહ્યું હતું કે અમે જુલમ કરનારાઓ, હત્યારાઓ, લૂંટારાઓને સજા કરવામાં નિષ્ફળ રહ્યા, બલ્કે નિર્દોષ લોકોની ધરપકડ કરીને લાંબા સમય સુધી જેલમાં રાખવામાં આવે છે. તેમણે કહ્યું હતું કે, ’20 વર્ષ પસાર થયા પછી કોર્ટ તેને મુક્ત કરી દે છે. કોઈપણ રમખાણોના કિસ્સામાં, મુસ્લિમોને મારી નાખવામાં આવે છે અને લૂંટવામાં પણ આવે છે અને તેઓને દોષિત ગણીને સજા કરવામાં આવે છે. બાબરી મસ્જિદના ચુકાદા બાદ કોર્ટની ભૂમિકા પર સવાલ ઉઠ્યા છે. અદાલતો છેલ્લા કેટલાક સમયથી સરકારના દબાણ હેઠળ કામ કરી રહી છે.’
‘જેટલો આ દેશ મોદીનો છે, તેટલો જ…’
મદનીએ કહ્યું હતું કે, ‘ભારત આપણો દેશ છે, આ દેશ જેટલો નરેન્દ્ર મોદીનો છે, જેટલો મોહન ભાગવતનો છે, એટલો જ મોહમ્મદ મદનીનો છે. એક ઇંચ ન તેઓ અમારાથી આગળ છે અને ન એક ઇંચ આપણે તેમનાથી પાછળ છીએ. ઇસ્લામ આ દેશનો સૌથી જૂનો ધર્મ છે. આજે આપણા દેશમાં નફરતનું વાતાવરણ છે. પાયાવિહોણા પ્રોપેગેન્ડાનું કામ ઝડપથી થઈ રહ્યું છે અને સુપ્રીમ કોર્ટ પણ આવા લોકોને છોડીને તેમને પ્રોત્સાહિત કરી રહી છે. તેમને મુક્ત કરવામાં આવી રહ્યા છે, જેમને અમે દેશ માટે ખતરો માનીએ છીએ.’
