નેપાળની સંસદમાં મંગળવારે વડાપ્રધાન માટે વિશ્વાસ મત પર મતદાન થયું. પુષ્પ કમલ દહલને સમર્થનમાં 268 મત મળ્યા હતા. તેમને 270 વોટમાંથી માત્ર બે વોટ મળ્યા નથી. પ્રતિનિધિ સભામાં વિશ્વાસનો મત જીતતા પહેલા વડાપ્રધાન પ્રચંડે કહ્યું હતું કે, તેઓ અસ્વીકાર, અનાદર અને પ્રતિશોધની રાજનીતિને બદલે સર્વસંમતિ, સહકાર અને પરસ્પર વિશ્વાસની રાજનીતિને આગળ ધપાવવા માગે છે.
સર્વસંમતિ, સહકાર, વિશ્વાસની રાજનીતિને આગળ વધારવા માગુ છું: પ્રચંડ
નેપાળ કમ્યુનિસ્ટ પાર્ટી-માઓવાદી કેન્દ્રના 68 વર્ષીય નેતાએ 26 ડિસેમ્બરે ત્રીજી વખત વડાપ્રધાન તરીકે શપથ લીધા હતા. તેમણે નાટકીય રીતે નેપાળી કોંગ્રેસની આગેવાની હેઠળના પ્રી-પોલ ગઠબંધનમાંથી બહાર નીકળીને વિપક્ષના નેતા કેપી શર્મા ઓલી સાથે હાથ મિલાવ્યો હતો. વડાપ્રધાન પ્રચંડની નિમણૂક બાદ નેપાળની સંસદનું પ્રથમ સત્ર સોમવારે શરૂ થયું હતું. પ્રચંડે કહ્યું કે તેઓ વડાપ્રધાન તરીકે અસ્વીકાર, અનાદર અને બદલો લેવાની રાજનીતિને બદલે સર્વસંમતિ, સહકાર અને પરસ્પર વિશ્વાસની રાજનીતિને આગળ વધારવા માગે છે.
‘લોકોને કંઈક નવું આપવાનો સંકલ્પ’
વડાપ્રધાન પ્રચંડે વધુમાં કહ્યું હતું કે, સરકારના વડા તરીકે તેઓ નેપાળમાં રાષ્ટ્રીય એકતાનો સંદેશ વિશ્વને આપવા માગે છે. તેમણે પોતાની ફરજ અને જવાબદારીઓ પ્રત્યે સમર્પિત રહેવા અને લોકોને કંઈક નવું આપવાનો સંકલ્પ કર્યો છે. પ્રચંડને વડાપ્રધાન તરીકેનો કાર્યકાળ ચાલુ રાખવા માટે 275 સભ્યોની સંસદમાં 138 મતોની જરૂર હતી. જો કે હવે બહુમત પરીક્ષણ બાદ પ્રચંડની સામે પણ મોટી સમસ્યા ઊભી થઈ ગઈ છે. દેશની બે ટોચની પાર્ટીઓએ પ્રચંડને સમર્થન આપ્યું છે. આવી સ્થિતિમાં તેમના પર કોઈને પણ સાથે લઈને સરકાર બનાવવાનું દબાણ છે. નેપાળી કોંગ્રેસે અગાઉ પ્રચંડને સમર્થન આપ્યું ન હતું. જ્યારે મીડિયા અહેવાલ મુજબ, ઓલીએ તેમની અગાઉની સરકાર દરમિયાન પ્રચંડ સાથે દગો કર્યો હતો. ઓલી અને દેઉબા શરૂઆતથી જ એકબીજાના વિરોધી રહ્યા છે. પ્રચંડ ઈચ્છે તો પણ બંને પક્ષોને કેબિનેટમાં સામેલ કરી શકે નહીં.
