સામાન્ય રીતે અત્યાર સુધી એવું માનવામાં આવતું હતું કે જો 3 થી વધુ બાળકો એકસાથે જન્મે છે તો તેમના બચવાની શક્યતા ઓછી થઈ જાય છે. આ માન્યતા હવે તૂટી ગઈ છે કારણ કે એક જ માતાના ગર્ભમાંથી એકસાથે જન્મેલા 9 બાળકો 19 મહિના સુધી સતત સારવાર બાદ હવે તેમના ઘરે આવી ગયા છે. બાળકોને મોરોક્કોની હોસ્પિટલમાં સારવાર આપવામાં આવી હતી. માલીની એક મહિલાએ એક સાથે 9 બાળકોને જન્મ આપ્યો. આ એક સાથે જન્મેલા પહેલા ‘9’ છે જેઓ જીવતા બચી ગયા છે.
માલીમાં, હલીમા સિસે નામની મહિલાએ 25 વર્ષની ઉંમરે 9 બાળકોને જન્મ આપ્યો હતો. જ્યારે અલ્ટ્રાસાઉન્ડમાં ખબર પડી કે હલીમાના પેટમાં 7 થી વધુ બાળકો છે, જેમને ડિલિવરી કરવામાં મુશ્કેલીનો સામનો કરવો પડી શકે છે, ત્યારે તેને મે 2021 માં મોરોક્કો મોકલી દીધી હતી. બાળકોને કાસાબ્લાન્કામાં મેડિકલ સપોર્ટ પર મૂકવામાં આવ્યા હતા. હવે તમામ બાળકો સંપૂર્ણ રીતે સ્વસ્થ છે અને તેમની માતા પાસે છે.
જ્યારે બાળકો ઘરે પાછા ફર્યા શું હતું પિતાનું રિએક્શન
માલીની રાજધાની બમાકો પરત ફર્યા બાદ બાળકોના પિતા અબ્દેલ કાદર અરબીએ સરકારનો આભાર માન્યો અને કહ્યું કે સરકાર પરિવારને આર્થિક મદદ કરી રહી છે. તેમણે કહ્યું છે કે અલ્લાહે તેમને આશીર્વાદ આપ્યા છે. આ તેમની સંભાળ રાખવામાં મદદ કરશે. માલીના સ્વાસ્થ્ય મંત્રી ડાયમિનાટોઉ સંગારાએ કહ્યું છે કે સરકાર પરિવારને સમર્થન આપવાનું ચાલુ રાખશે.
સી સેક્શનથી પેદા થયા બાળકો
9 બાળકોમાંથી 5 છોકરીઓ અને 4 છોકરાઓ છે. તમામનો જન્મ સિઝેરિયન દ્વારા થયો હતો. અહેવાલ અનુસાર, છોકરીઓના નામ કાદિદિયા, ફાતિમા, હવા, અદામા અને ઔમૌ છે. છોકરાઓના નામ મોહમ્મદ, ઉમર, એલ્હાદજી અને બાહ છે. જન્મ સમયે આ બાળકોનું વજન 500 ગ્રામથી 1 કિલોગ્રામની વચ્ચે હતું.
બાળકો માટે જીવવું ખૂબ મુશ્કેલ બની ગયું હોત, જો…
જો બાળકોને સ્પેશિયલ ટ્રીટમેન્ટ આપવામાં ન આવી હોત તો તેમની સ્વાસ્થ્ય સમસ્યાઓ વધી શકે તેમ હતી. આ જ કારણ છે કે તેમને હોસ્પિટલમાં રાખવામાં આવ્યા હતા. પ્રથમ મહિના માટે તેમને હોસ્પિટલમાં રાખવામાં આવ્યા હતા. પછી તેમને એક એપાર્ટમેન્ટમાં ખસેડવામાં આવ્યા હતા જ્યાં એન બોર્જા ક્લિનિક દ્વારા તેમની ચોવીસ કલાક સંભાળ રાખવામાં આવતી હતી.