હાઈકોર્ટમાં ન્યાયાધીશોની નિમણૂકને લઈને કેન્દ્ર સરકાર અને સુપ્રીમ કોર્ટ વચ્ચે ખેંચતાણ જોવા મળી રહી છે. અહેવાલ છે કે કાયદા મંત્રાલયે ગયા અઠવાડિયે સુપ્રીમ કોર્ટ કોલેજિયમ દ્વારા મોકલવામાં આવેલા 20 નામ પરત મોકલી દીધા છે. તેમાંથી 9 નામ એવા છે જેને સુપ્રીમ કોર્ટ કોલેજિયમ દ્વારા ફરીથી મોકલવામાં આવ્યા હતા.
જણાવી દઈએ કે સુપ્રીમ કોર્ટ કોલેજિયમ જો ન્યાયાધીશોના નામની ફરીથી ભલામણ કરે છે, તો સરકાર તેમની નિમણૂક કરવા માટે બંધાયેલી છે. જો કે, પહેલા પણ એવા ઘણા ઉદાહરણો સામે આવ્યા છે જ્યારે સરકારે ફાઇલો પાછી મોકલી હોય અથવા તેને પેન્ડિંગ રાખી હોય.
એક અંગ્રેજી અખબારમાં છપાયેલા સમાચાર મુજબ સૌરભ ક્રિપાલનું નામ પણ તેમાં સામેલ છે. સૌરભ ક્રિપાલ સુપ્રીમ કોર્ટના ચીફ જસ્ટિસ બીએન ક્રિપાલના પુત્ર છે. પહેલીવાર દિલ્હી હાઈકોર્ટ કોલેજિયમે 2017માં ન્યાયાધીશ પદ માટે તેમના નામની ભલામણ કરી હતી.
ઉલ્લેખનીય છે કે, સૌરભ ક્રિપાલ ગે છે. તેમણે જાહેરમાં તેનો સ્વીકાર પણ કર્યો છે. એવું માનવામાં આવે છે કે તેમની સામે સરકારના વાંધાઓનું આ પણ એક કારણ હોઈ શકે છે. જો કે, ન તો સરકાર કે કોલેજિયમે કારણો જાહેર કર્યા છે. એવું પણ અનુમાન લગાવવામાં આવી રહ્યું છે કે દૂતાવાસમાં કામ કરતા સૌરભ ક્રિપાલના પાર્ટનરના કારણે સરકારે તેના નામ પર વાંધો નોંધાવ્યો છે. તેના પાર્ટનરનું નામ જાહેર કરવામાં આવ્યું નથી પરંતુ એવું કહેવામાં આવી રહ્યું છે કે તે વિદેશી છે. એવું માનવામાં આવે છે કે તેમનું નામ પરત કરવા પાછળ આ પણ એક કારણ હોઈ શકે છે.