લંડનઃ વન-ડે ક્રિકેટમાંથી બેન સ્ટોક્સની નિવૃત્તિ બાદ ઘણા ખેલાડીઓ ક્રિકેટના વ્યસ્ત શેડ્યૂલ પર પોતાનો અભિપ્રાય આપી રહ્યા છે. આ ખેલાડીઓમાં દક્ષિણ આફ્રિકાનો ક્વિન્ટન ડી કોક પણ સામેલ છે. ઈંગ્લેન્ડ સામેની ત્રીજી વનડેમાં 92 રન બનાવ્યા બાદ તેણે કહ્યું કે જો ક્રિકેટના વ્યસ્ત કાર્યક્રમમાં વધુ મેચો ઉમેરવામાં આવશે તો તેનાથી દબાણ વધશે. જેના કારણે ખેલાડીઓ માટે આ રમતના ત્રણેય ફોર્મેટમાં રમવું મુશ્કેલ બનશે. વરસાદના કારણે આ મેચ રદ કરવામાં આવી હતી.
પાકિસ્તાનના ભૂતપૂર્વ ફાસ્ટ બોલર વસીમ અકરમે ગયા અઠવાડિયે કહ્યું હતું કે તે બેન સ્ટોક્સની નિવૃત્તિ પાછળના કારણોને સમજે છે. ઇંગ્લેન્ડના ભૂતપૂર્વ કેપ્ટન નાસિર હુસૈને વૈશ્વિક ક્રિકેટ કાર્યક્રમને ગાંડપણ ગણાવ્યું હતું. તેમણે કહ્યું હતું કે ખેલાડીઓએ પોતાના નિર્ણયો લેવાની જરૂર છે અને જે ખેલાડીઓને લાગે છે કે તેઓ ત્રણેય ફોર્મેટમાં રમી શકે છે, તો હું તેમના માટે ખુશ છું.
ડી કોકે ટેસ્ટ ક્રિકેટને અલવિદા કહી દીધું હતું
29 વર્ષીય ખેલાડીએ તેના પરિવાર સાથે વધુ સમય વિતાવવા માટે ડિસેમ્બર 2021માં ટેસ્ટ ક્રિકેટમાંથી નિવૃત્તિની જાહેરાત કરી હતી. તેણે તેની ટેસ્ટ કારકિર્દીમાં 54 મેચમાં 3300 રન બનાવ્યા છે, જેમાં 6 સદી સામેલ છે. ડી કોકે રવિવારે કહ્યું, ‘મને કેટલીક લીગ રમવા માટે બોલાવવામાં આવ્યો હતો. પરંતુ અહીં રમવું કે ન રમવું એ મારો પોતાનો નિર્ણય હતો અને હું રમીને ખુશ છું.
વિકેટ કીપર બેટ્સમેન ડી કોકે કહ્યું કે જ્યારે તમે યુવાન હોવ ત્યારે તમારે ત્રણેય ફોર્મેટમાં રમવાની અને તમારી કારકિર્દીમાં કંઈક હાંસલ કરવાની જરૂર છે. પરંતુ જેમ જેમ તમે મોટા થાઓ છો તેમ તેમ તમારું શરીર પહેલાની જેમ સહકાર આપતું નથી.
ઈંગ્લેન્ડ અને સાઉથ આફ્રિકા વચ્ચે વનડે બાદ ટી-20 સિરીઝ યોજાવાની છે. બુધવારથી બ્રિસ્ટોલમાં ત્રણ મેચની T20I શ્રેણી શરૂ થશે. આમાં દક્ષિણ આફ્રિકાની ટીમનું નેતૃત્વ ડેવિડ મિલર કરશે. જોસ બટલર ઈંગ્લેન્ડનું નેતૃત્વ કરશે.
