ઇન્ડિયન પ્રીમિયર લીગ 2023 ની 17મી મેચ 12 એપ્રિલે રાજસ્થાન રોયલ્સ અને ચેન્નાઈ સુપર કિંગ્સ વચ્ચે રમાઈ હતી. ચેપોક ખાતે રમાયેલી આ રોમાંચક મેચમાં રાજસ્થાને ચેન્નાઈને 3 રને હરાવ્યું હતું. મેચમાં જીત અને હારનો નિર્ણય છેલ્લા બોલ પર થઈ ગયો હતો. જીતવા માટે છેલ્લા બોલ પર 5 રનની જરૂર હતી. પરંતુ સ્ટ્રાઈક પર આવેલ એમએસ ધોની એક રન બનાવવામાં સફળ રહ્યો હતો. પ્રથમ બેટિંગ કરતા સંજુ સેમસનની ટીમે 8 વિકેટે 175 રન બનાવ્યા હતા. જીત માટે 176 રનના લક્ષ્યાંકને હાંસલ કરવા ઉતરેલી ચેન્નાઈની ટીમ 20 ઓવરમાં 6 વિકેટે 172 રન બનાવી શકી હતી. રવિચંદ્રન અશ્વિને રાજસ્થાનને મેચ જીતાડવામાં મહત્વની ભૂમિકા ભજવી હતી. આ મેચમાં બોલ અને બેટ સાથેના જોરદાર પ્રદર્શન માટે તેને પ્લેયર ઓફ ધ મેચનો એવોર્ડ આપવામાં આવ્યો હતો.
‘મેં લોકોને આશ્ચર્યચકિત કર્યા’
આર અશ્વિને આ મેચમાં બોલ અને બેટથી શાનદાર પ્રદર્શન કર્યું હતું. તેણે પહેલા તેની ટીમ માટે મૂલ્યવાન 30 રન બનાવ્યા અને બાદમાં શાનદાર બોલિંગ કરીને 2 વિકેટ લીધી. પ્લેયર ઓફ ધ મેચ તરીકે પસંદ થયા બાદ આર અશ્વિને કહ્યું, ‘મેં લોકોને ચોંકાવી દીધા. આ રોલ મને આપવામાં આવ્યો છે. હું મારી કુશળતા સાથે ન્યાય કરવા માટે વધુ સારી રીતે સજ્જ છું. મેં મારી બેટિંગનો આનંદ માણ્યો. હું દરેક મેચમાં બેટિંગ કરવા તૈયાર છું. બોલિંગ ઘણી હદ સુધી માનસિક સ્તર પર આધાર રાખે છે. હું ક્રીઝ પર થોડો ઝડપી હતો. મેં મારી બેકસીટ લઈ લીધી છે અને મને લાગે છે કે બોલિંગ માં સુધાર થઈ રહ્યો છે. મેં બોલિંગમાં વેરિએશન કર્યું છે. જો મેં છેલ્લા 2 વર્ષમાં આ ન કર્યું હોત, તો હું આજે જે કરી રહ્યો છું તે કરી શક્યો ન હોત. સફળતા કે નિષ્ફળતા મારી શરતો પર હોવી જોઈએ.
રાજસ્થાન રોયલ્સ ટોપ પર પહોંચી
ચેન્નાઈ સુપર કિંગ્સ સામેની રોમાંચક જીત બાદ રાજસ્થાન રોયલ્સ ટીમ ફરી એકવાર પોઈન્ટ ટેબલમાં ટોપ પર પહોંચી ગઈ છે. સંજુ સેમસનની ટીમે IPL 2023માં અત્યાર સુધી શાનદાર પ્રદર્શન કર્યું છે. રાજસ્થાને ઈન્ડિયન પ્રીમિયર લીગની 16મી સિઝનમાં ચાર મેચ રમી છે, જેમાં 3માં જીત અને એકમાં હાર થઈ છે. 6 પોઈન્ટ અને વધુ સારા નેટ રન રેટના કારણે રાજસ્થાનની ટીમ પોઈન્ટ ટેબલમાં પ્રથમ સ્થાન મેળવવામાં સફળ રહી હતી.