ભારતના બે બિઝનેસ દિગ્ગજોએ ભારે દેવામાં ડૂબેલી કંપનીને ખરીદવા માટે બિડ લગાવવાની તૈયારી કરી છે. આ કંપની છે બિગ બજારવાળી ફ્યુચર રિટેલ કંપની અને આ બે દિગ્ગજ છે મુકેશ અંબાણી અને ગૌતમ અદાણી. ગયા વર્ષે રિલાયન્સ ઈન્ડસ્ટ્રીઝ બિગ બજાર ખરીદવા આગળ આવી હતી. પરંતુ ડીલ બાબતે વાત પહોંચી શકી ન હતી. પરંતુ હવે તેને ખરીદવાની દોડ ફરી શરૂ થઈ છે. આગામી થોડા દિવસોમાં રિલાયન્સ અને અદાણી ગ્રુપ ફ્યુચર રિટેલને ખરીદવા માટે સામસામે આવશે. અદાણી અને અંબાણી સિવાય 47 અન્ય ખરીદદારોએ પણ કિશોર બિયાનીની આ કંપની ખરીદવામાં રસ દાખવ્યો છે. આ માહિતી સામે આવ્યા બાદ તેની અસર તેના શેર પર પણ જોવા મળી રહી છે. કંપનીનો શેર 2.50 રૂપિયા પર ટ્રેન્ડ કરી રહ્યો છે, જે 4.17 ટકા વધુ છે.
આ ખરીદનાર પણ રેસમાં
રિલાયન્સ રિટેલ અને અદાણી ગ્રુપ ઉપરાંત ખરીદદારોમાં ડબ્લ્યુએચ સ્મિથ, જિંદાલ પાવર્સ લિમિટેડ, ગાર્ડન બ્રધર્સ જેસી ફ્લાવર્સનો સમાવેશ થાય છે. ટૂંક સમયમાં જ બિઝનેસ જગતમાં ભારતના બે ઉદ્યોગપતિઓ વચ્ચે ટક્કર જોવા મળશે. હાલમાં મુકેશ અંબાણી એશિયાના સૌથી અમીર વ્યક્તિ છે, તેમની સામે એશિયાના ભૂતપૂર્વ અમીર ગૌતમ અદાણી હશે.
7 એપ્રિલે ફ્યુચર રિટેલ ખરીદતી કંપનીઓ પાસેથી એક્સપ્રેશન ઓફ ઈન્ટરેસ્ટ (EOI) પ્રાપ્ત થયા હતા. એક સમયે ફ્યુચર ગ્રુપ ભારતમાં રિટેલર ફર્મના સંદર્ભમાં બીજા ક્રમે હતું. તેમની પાસે હાલમાં વિવિધ લેણદારોના 21 હજાર કરોડથી વધુની જવાબદારી છે. કોરોના દરમિયાન આ કંપનીની હાલત ખરાબ થઈ ગઈ હતી. જ્યારે કંપની લોન ચૂકવી શકી નથી, ત્યારે તે નાદારીની પ્રક્રિયાનો સામનો કરી રહી છે.
રિલાયન્સે આપી હતી ઓફર
રિલાયન્સ ઈન્ડસ્ટ્રીઝે કંપનીને 24 હજાર 713 કરોડ રૂપિયામાં હસ્તગત કરવાની દરખાસ્ત કરી હતી. પરંતુ બાદમાં તેને રદ કરવી પડી હતી. કંપનીએ મેનેજમેન્ટ સ્તરે પણ કટોકટીનો સામનો કરવો પડ્યો હતો. આ વર્ષે 23 જાન્યુઆરીએ કિશોર બયાનીએ ડિરેક્ટર પદ પરથી રાજીનામું આપ્યું હતું. પરંતુ 10 માર્ચે તેમણે રાજીનામું પાછું લઈ લીધું હતું. તેના પછી ફ્યુચર ગ્રૂપને ખરીદવા માટે ખરીદદારો વચ્ચે સ્પર્ધા થઈ. હવે આ કંપની કોના પોર્ટફોલિયોનો ભાગ બનશે તે તો સમય જ કહેશે.
