IPL 2023માં લખનઉ સુપર જાયન્ટ્સ અને રોયલ ચેલેન્જર્સ બેંગ્લોર વચ્ચેની મેચ ખૂબ જ વિવાદાસ્પદ રહી હતી. આરસીબીની ટીમે આ મેચ 18 રને જીતી લીધી હતી. આ મેચ દરમિયાન RCBના પૂર્વ કેપ્ટન વિરાટ કોહલી આક્રમક અંદાજમાં જોવા મળ્યો હતો. મેચ દરમિયાન તેની નવીન ઉલ હક સાથે ઝઘડો થયો હતો અને મેચ ખતમ થયા બાદ તેની ગૌતમ ગંભીર સાથે ઝઘડો પણ થયો હતો. આ ત્રણેય ખેલાડીઓ IPLના નિયમોનું ઉલ્લંઘન કરવા બદલ દોષી સાબિત થયા છે. ગંભીર અને કોહલીને તેમની સંપૂર્ણ મેચ ફીનો દંડ ફટકારવામાં આવ્યો છે, જ્યારે નવીન-ઉલ-હકને તેમની મેચ ફીના 50 ટકા દંડ ફટકારવામાં આવ્યો છે.
IPLની મીડિયા રિલીઝમાં કહેવામાં આવ્યું છે કે “લખનઉ સુપર જાયન્ટ્સના મેન્ટર ગૌતમ ગંભીરને ઇકાના ક્રિકેટ સ્ટેડિયમ ખાતે ઇન્ડિયન પ્રીમિયર લીગ (IPL) 2023ની રોયલ ચેલેન્જર્સ બેંગ્લોર સામેની મેચ દરમિયાન IPL આચાર સંહિતાના ભંગ બદલ 100 ટકા મેચ ફીનો દંડ ફટકારવામાં આવ્યો છે. ગંભીરે આઈપીએલ આચાર સંહિતાની કલમ 2.21 હેઠળ લેવલ 2નો ગુનો કબૂલ કર્યો છે.
આ જ મીડિયા રીલીઝમાં વધુમાં જણાવવામાં આવ્યું છે કે “રોયલ ચેલેન્જર્સ બેંગ્લોરના બેટ્સમેન વિરાટ કોહલીને મેચ દરમિયાન આઈપીએલ આચાર સંહિતાનો ભંગ કરવા બદલ તેની મેચ ફીના 100 ટકા દંડ ફટકારવામાં આવ્યો છે. કોહલીએ IPL કોડ ઓફ કન્ડક્ટની કલમ 2.21 હેઠળ લેવલ 2નો ગુનો કબૂલ કર્યો છે.
મેચ બાદ કોહલી અને ગંભીર વચ્ચે બોલાચાલી થઈ હતી, જેના પગલે અમિત મિશ્રા, આરસીબીના કેપ્ટન ફાફ ડુ પ્લેસિસ અને એલએસજીના સહાયક કોચ વિજય દહિયાએ બચાવમાં આવવું પડ્યું હતું. બાદમાં કોહલી એલએસજીના કેપ્ટન કેએલ રાહુલ સાથે પણ વાત કરતો જોવા મળ્યો હતો.
એલએસજીના ઝડપી બોલર નવીન-ઉલ-હકને પણ આઈપીએલની આચાર સંહિતાનો ભંગ કરવા બદલ મેચ ફીના 50 ટકા દંડ ફટકારવામાં આવ્યો હતો. મેચ પછી હાથ મિલાવતા દરમિયાન નવીન-ઉલ-હક અને કોહલી વચ્ચે અથડામણ થઈ હતી. આઈપીએલની મીડિયા રીલીઝમાં કહેવામાં આવ્યું છે કે રોયલ ચેલેન્જર્સ બેંગ્લોર સામેની મેચ દરમિયાન આઈપીએલની આચાર સંહિતાનો ભંગ કરવા બદલ લખનઉ સુપર જાયન્ટ્સના બોલર નવીન-ઉલ-હકને તેની મેચ ફીના 50 ટકા દંડ ફટકારવામાં આવ્યો છે. નવીન-ઉલ-હકે IPL આચાર સંહિતાની કલમ 2.21 હેઠળ લેવલ 1નો ગુનો કબૂલ કર્યો છે.”
બેંગ્લોરની જીત પછી જ્યારે બંને ટીમોના હાથ મિલાવવાની વાત આવે છે, ત્યારે કોહલી નવીન સાથે હાથ મિલાવતા કંઈક કહેતો જોવા મળે છે. કોહલી બોલતાની સાથે જ નવીન પણ અચરજમાં આવીને કંઈક બોલે છે. અહીં પણ બંને વચ્ચે બોલાચાલી થાય છે. જ્યારે કોહલી બાઉન્ડ્રી પાસે ચાલતો હોય છે ત્યારે તે લખનઉના કાયલ મેયર્સ સાથે વાત કરવાનું શરૂ કરે છે. આ દરમિયાન ગંભીર ત્યાં પહોંચે છે અને મેયર્સને લઈ જાય છે અને કોહલી સાથે વાત કરવાની ના પાડી દે છે. આ પછી ગંભીર કંઈક બોલે છે જેના પર કોહલી તેને નજીક બોલાવે છે અને તેની સાથે વાતચીત કરવાનો પ્રયાસ કરે છે. આ દરમિયાન કોહલી અને ગંભીર બંને ખૂબ નજીક આવે છે અને બંને વચ્ચે ઝઘડો થાય છે. અંતે કોહલી અને લોકેશ રાહુલ વચ્ચે લાંબી વાતચીત થઈ હતી.
