આજે માસ્ટર બ્લાસ્ટર સચિન તેંડુલકરનો 50મો જન્મદિવસ છે. તેમને ક્રિકેટ વર્લ્ડનો ભગવાન પણ કહેવામાં આવે છે. ક્રિકેટ રમતા તેમણે ઘણા રેકોર્ડ પોતાના નામે કર્યા છે. તેમણે 16 વર્ષની ઉંમરે ક્રિકેટ જગતમાં પ્રવેશ કર્યો હતો. સચિન માત્ર રમતના કૌશલ્યમાં જ ‘અમીર’ નથી રહ્યા. સંપત્તિના મામલામાં પણ તેમના નામે ઘણા રેકોર્ડ છે. તેઓ વિશ્વના સૌથી અમીર ક્રિકેટરોમાંના એક છે. 2001માં તેઓ એક બ્રાન્ડ સાથે 100 કરોડ રૂપિયાની ડીલ કરનારા પ્રથમ ભારતીય બન્યા હતા. તેમની કુલ નેટવર્થ 1,350 કરોડ રૂપિયા છે. આ મહેન્દ્ર સિંહ ધોની અને વિરાટ કોહલીની નેટવર્થ કરતાં વધુ છે.
સચિન તેંડુલકરે 2013માં ક્રિકેટમાંથી સંન્યાસ લઈ લીધો હતો, પરંતુ તે પછી પણ તેમની કમાણીનો ગ્રાફ હજુ નીચે આવ્યો નથી. વૃદ્ધ થવાની સાથે તેમની સંપત્તિ પણ વધી રહી છે. 2020માં તેમની કુલ સંપત્તિ 834 કરોડ હતી. 2021માં તે વધીને 1,080 કરોડ થઈ ગઈ. હવે આ આંકડો 1,350 કરોડ રૂપિયા પર પહોંચી ગયો છે.
જાહેરાતોથી કરી ઘણી કમાણી
સચિન કોકા કોલા, એડિડાસ, BMW ઈન્ડિયા, તોશિબા, જિલેટ સહિત ઘણી કંપનીઓની જાહેરાતોમાં દેખાયો છે. તે બ્રાન્ડ એન્ડોર્સમેન્ટથી દર વર્ષે 20-22 કરોડ કમાય છે. સચિનનો કપડાંનો બિઝનેસ પણ છે. તેમની બ્રાન્ડ ટ્રુ બ્લુ એ અરવિંદ ફેશન બ્રાન્ડ્સ લિમિટેડ વચ્ચેનું જોઈન્ટ વેન્ચર છે. તેને 2016માં લોન્ચ કરવામાં આવી હતી. 2019માં ટ્રુ બ્લુ અમેરિકા અને ઈંગ્લેન્ડમાં લોન્ચ કરવામાં આવ્યો હતો.
રોકાણ
સચિન તેંડુલકર રેસ્ટોરન્ટ બિઝનેસમાં પણ છે. સચિન એન્ડ તેંડુલકરના નામની મુંબઈ અને બેંગ્લોરમાં રેસ્ટોરાં છે. માસ્ટર બ્લાસ્ટર સ્પોર્ટ્સ મેનેજમેન્ટ કંપની SRT સ્પોર્ટ્સ મેનેજમેન્ટનો પણ માલિક છે. Smartron India, Spinney, S Drive અને Sach જેવી કંપનીઓમાં રોકાણ કર્યું છે. સચિનના રૂપિયા મનોરંજન અને ટેક્નોલોજી કંપની જેટસિન્થેસિસ (JetSynthesys) માં પણ રોકાયેલા છે.
મુંબઈ અને લંડનમાં ઘર
સચિન તેંડુલકર બાન્દ્રા સ્થિત એક આલીશાન બંગલામાં રહે છે. તેની અંદાજિત કિંમત 100 કરોડ રૂપિયા છે. સચિને આને 39 કરોડ રૂપિયામાં ખરીદ્યો હતો. 6,000 ચોરસ ફૂટમાં ફેલાયેલા આ ત્રણ માળના બંગલાના નીચેના ભોંયરામાં 40 થી 50 કાર માટે પાર્કિંગની જગ્યા છે. સચિન પાસે બાન્દ્રાના કુર્લા કોમ્પ્લેક્સમાં એક ફ્લેટ પણ છે, જેની કિંમત લગભગ 6 થી 8 કરોડ રૂપિયા છે. કેરળમાં તેમના નામે એક પ્રોપર્ટી છે, જેની કિંમત લગભગ 78 કરોડ રૂપિયા છે. ઈંગ્લેન્ડના લંડનમાં સચિનનું પોતાનું ઘર પણ છે.
લક્ઝરી કારનો કાફલો
સચિન તેંડુલકરને લક્ઝરી કારનો પણ ખૂબ શોખ છે. તેમની પાસે 20 કરોડથી વધુની કિંમતની 10 કાર છે. તેમની પાસે BMW i-8 પણ છે. તેની પાસે 360 મોડેના ફેરારી કાર પણ છે. તેમની પાસે BMW M5, Mercedes Benz, BMW X5M અને BMW M6 પણ છે.