વડોદરામાં પોલીસને મોટી સફળતા મળી છે. પાંચ વર્ષ પહેલા હજાર ઢોરનો તબેલો બનાવવાની સ્કીમમાં 3 ટકાનું વળતર આપવાનું કહીને રોકાણ કરાવી અનેક લોકોના રૂ.38.70 લાખ લઈ પોર્ટુગલ ફરાર થઈ જનારા માસ્ટર માઇન્ડ આરોપીની ધરપકડ કરાઈ છે. આ મામલે પોલીસે આગળની કાયદેસરની કાર્યવાહી હાથ ધરી છે.
માહિતી મુજબ, વર્ષ 2017-2019 દરમિયાન નસરીન, નીરજ કુમાર અને હેતૂક પટેલ નામના ત્રણ ભાગીદારોએ શહેરના સાવલી રોડ પર આવેલા લોટસ ઓરા-વનમાં ઓફિસ રાખી હતી અને સિવંતા કેપિટલ અનમોલ ડેરી નામની ફર્મ શરુ કરી હતી. તેમણે લોકોને કહ્યું હતું કે સાવલી તાલુકામાં ગોઠડા ગામે હજાર ઢોરોનો તબેલો બનાવ્યો છે અને ત્યાં હાલ 70 ઢોર છે જ્યારે વધુ ઢોર માટે નાણાંની જરૂર છે. સાથે જ તેમણે કેટલાક લોકોને તબેલાની સ્કીમમાં રોકાણ કરવા બદલ 3 ટકાના વળતરની પણ લાલચ આપી હતી.
ગ્રાહકોને આપેલા ચેક બાઉન્સ થતા ભાંડો ફૂટ્યો
જો કે, તેમની લોભામણી વાતો અને સ્કીમમાં આવી કેટલાક લોકોએ રોકાણ કર્યું હતું. ગ્રાહકો પાસે રોકાણ કરાવ્યા બાદ થોડા સમય પછી આરોપીઓએ વળતર આપવાનું બંધ કર્યું હતું. ઉપરાંત, આરોપીઓએ જે ચેક ગ્રાહકોને આપ્યા હતા તે પણ બાઉન્સ થયા હતા. આથી છેતરપિંડીની જાણ થતા લોકોએ મકરપુરા પોલીસ સ્ટેશનમાં ફરિયાદ નોંધાઇ હતી. આ મામલે હવે, માસ્ટર માઇન્ડ હેતૂક પટેલની ધરપકડ કરવામાં આવી છે. પૂછપરછમાં જાણવા મળ્યું કે તે પોર્ટુગલ ખાતે ભાગી ગયો હતો. પરત ફરતા બાતમીના આધારે પેરોલ ફર્લો સ્ક્વોડે તેને રહેણાંક મકાનેથી ઝડપી પાડ્યો હતો અને મકરપુરા પોલીસને સોંપવા તજવીજ કરી છે.
