સુખવિંદર સિંહ સુખુએ હિમાચલ પ્રદેશના મુખ્યમંત્રી તરીકે શપથ લીધા છે. જયારે મુકેશ અગ્નિહોત્રીએ ડેપ્યુટી સીએમ તરીકે શપથ લીધા. હિમાચલના રાજ્યપાલ રાજેન્દ્ર વિશ્વનાથ આર્લેકરે સુખવિંદર સુખુને શપથ લેવડાવ્યા હતા. આ દરમિયાન કોંગ્રેસ અધ્યક્ષ મલ્લિકાર્જુન ખડગેની સાથે રાહુલ ગાંધી અને પ્રિયંકા ગાંધી પણ હાજર હતા. આ સાથે કોંગ્રેસ નેતા સુખવિંદર સિંહ સુખુ હિમાચલ પ્રદેશના મુખ્યમંત્રી બની ગયા છે.
શિમલામાં કોંગ્રેસ વિધાયક દળની બેઠકમાં સુખુને ધારાસભ્ય દળના નેતા તરીકે પસંદ કરવામાં આવ્યા હતા. વાસ્તવમાં કોંગ્રેસની હિમાચલ ચૂંટણીમાં જીત બાદ સીએમ પદ માટે ઘણા દાવેદારોના નામ સામે આવી રહ્યા હતા. ઘણા સમર્થકો રાજ્યના પૂર્વ સીએમ સ્વર્ગસ્થ વીરભદ્ર સિંહની પત્ની પ્રતિભા સિંહને સીએમ બનાવવાની માંગ કરી રહ્યા હતા, પરંતુ તમામ ઝઘડા વચ્ચે કોંગ્રેસ હાઈકમાન્ડે સુખવિંદર સુખુને હિમાચલના નવા સીએમ બનાવ્યા.
શપથગ્રહણ બાદ જ સ્ટેજ પર પૂર્વ સીએમ વીરભદ્ર સિંહના ફોટો પર પુષ્પાંજલિ અર્પણ કરવામાં આવી હતી અને તમામ નેતાઓએ હાથ જોડીને તેમને નમન કર્યા હતા. પહાડી રાજ્યના હમીરપુર જિલ્લાના નાદૌનના ધારાસભ્ય સુખુએ તાજેતરમાં યોજાયેલી રાજ્ય ચૂંટણી માટે કોંગ્રેસની પ્રચાર સમિતિનું નેતૃત્વ કર્યું હતું.