દિલ્હી બીજેપી અધ્યક્ષ આદેશ ગુપ્તાએ રાજીનામું આપી દીધું છે. દિલ્હી મ્યુનિસિપલ કોર્પોરેશનની ચૂંટણીમાં હાર બાદ આદેશ ગુપ્તાએ રાજીનામું આપી દીધું છે. વીરેન્દ્ર સચદેવાને હાલ માટે કાર્યકારી પ્રમુખ બનાવવામાં આવ્યા છે. તેઓ આગામી પ્રમુખની નિમણૂક ન થાય ત્યાં સુધી આ પદ સંભાળશે. આ વખતે બીજેપીએ દિલ્હી MCD ચૂંટણીમાં પોતાની તમામ તાકાત લગાવી દીધી, પરંતુ તેમ છતાં તેમને AAP સામે હારનો સામનો કરવો પડ્યો.
આદેશ ગુપ્તાએ સ્પષ્ટતા કરી છે કે જો AAPને બહુમતી મળી છે તો આગામી મેયર આમ આદમી પાર્ટીનો હશે. MCDમાં ભાજપ મજબૂત વિપક્ષની ભૂમિકા ભજવશે. અમે MCDમાં ચોકીદારની જેમ ભ્રષ્ટાચાર થવા દઈશું નહીં. દિલ્હી સ્વચ્છ હોવું જોઈએ અને MCD સારું કામ કરે, આ અમારી પ્રાથમિકતા હશે. અગાઉ તેમણે એવો સંકેત આપ્યો હતો કે મેયર ભાજપનો જ હશે.
આમ આદમી પાર્ટી (AAP) એ દિલ્હી મ્યુનિસિપલ કોર્પોરેશનમાં ભાજપના 15 વર્ષના શાસનનો અંત લાવ્યો અને 250-સીટ MCDમાં 134 બેઠકો જીતીને બહુમતી મેળવી. બીજી તરફ બીજેપીને 104 સીટો મળી છે. જ્યારે કોંગ્રેસ માત્ર 9 બેઠકો જીતી શકી હતી. ત્રણ બેઠકો પર અપક્ષ ઉમેદવારોનો વિજય થયો હતો.