સંયુક્ત રાષ્ટ્રની શરણાર્થી એજન્સી UNHCRએ કહ્યું કે 2022માં વિશ્વભરના 100 મિલિયન લોકોને તેમના ઘર છોડવા માટે મજબૂર થવું પડ્યું અને સંયુક્ત રાષ્ટ્ર તેમની મદદ કરવાનો પ્રયાસ કરી રહ્યું છે. એક સમાચાર એજન્સીએ યુએન ન્યૂઝને ટાંકીને કહ્યું કે એજન્સીના વડા ફિલિપો ગ્રાન્ડીએ આ આંકડાને રેકોર્ડ ગણાવ્યો. આ આંકડો 2021માં લગભગ 90 મિલિયનથી વધુ છે. યૂક્રેન, ઇથોપિયા, બુર્કિના ફાસો, સીરિયા અને મ્યાનમાર સહિત વિશ્વના ઘણા ભાગોમાં હિંસા અથવા અન્ય કારણોસર આ વિસ્થાપન થયું છે.
યુએન ન્યૂઝે ચેતવણી આપી છે કે હજારો સ્થળાંતર કરનારાઓએ યુરોપને પસંદગીના સ્થળ તરીકે જોયુ છે અને તે તરફ નીકળી પડ્યા. યમનમાં લાંબા સમયથી ચાલી રહેલા સંઘર્ષને કારણે 4.3 મિલિયનથી વધુ લોકો તેમનું ઘર છોડવા મજબૂર બન્યા. મે મહિનામાં, યુએન સ્થળાંતર એજન્સી IOM અને યુરોપિયન યુનિયનની માનવતાવાદી સહાય શાખા ECHO એ જાહેરાત કરી હતી કે તેઓ સંઘર્ષથી વિસ્થાપિત 325,000 થી વધુ લોકોની જરૂરિયાતોને પહોંચી વળવા માટે કામ કરી રહ્યા છે.
દેશમાં આઈઓએમ મિશનના વડા ક્રિસ્ટા રોટ્ટેનસ્ટેઈનરે જણાવ્યું કે યમનમાં સ્થળાંતર કરનારાઓ માટે પણ પરિસ્થિતિ વધુ ખરાબ થઈ રહી છે, ખાસ કરીને સ્ત્રીઓ, જે યમનમાં ભયંકર પરિસ્થિતિમાં જીવે છે, જેમનું પોતાના જીવન પર ખૂબ જ ઓછું નિયંત્રણ છે. યુએન ન્યૂઝે કહ્યું કે, સીરિયામાં 11 વર્ષથી ચાલી રહેલા યુદ્ધથી જનજીવન પ્રભાવિત થઈ રહ્યું છે. ત્યાં જન્મેલા લગભગ 50 લાખ બાળકોએ દેશમાં ક્યારેય શાંતિ જોઈ નથી.
80,000 થી વધુ સીરિયનો જોર્ડનના વિશાળ કેમ્પને જ ઘર કહે છે. જુલાઇમાં, જોર્ડનની રાજધાની અમ્માનમાં યુએનએચસીઆરના પ્રતિનિધિ ડોમિનિક બાર્ટશે જણાવ્યું હતું કે વિસ્થાપિતોની વાપસીની સંભાવનાઓ અત્યારે આશાસ્પદ નથી. જોર્ડનમાં લગભગ 6 લાખ 75 હજાર સીરિયન શરણાર્થીઓ રહે છે. આમાંના મોટા ભાગના નગરો અને ગામડાઓમાં સ્થાનિક સમુદાયો વચ્ચે રહે છે, માત્ર 17 ટકા બે મુખ્ય શરણાર્થી શિબિરો, જાતારી અને અજરકમાં રહે છે.
પાંચ વર્ષ પહેલાં લાખો રોહિંગ્યા મ્યાનમારમાં તેમના ઘર છોડીને ભાગી ગયા હતા. પડોશી દેશ બાંગ્લાદેશના કોક્સ બજાર કેમ્પમાં લગભગ 10 લાખ લોકો રહે છે. સંયુક્ત રાષ્ટ્રની શરણાર્થી એજન્સીના આંકડા દર્શાવે છે કે ડિસેમ્બર સુધીમાં સમગ્ર યુરોપમાં 7.8 મિલિયનથી વધુ યૂક્રેનિયન શરણાર્થીઓ નોંધાયા હતા. ઇથોપિયામાં તિગ્રે વિસ્તારમાં સશસ્ત્ર સંઘર્ષને કારણે લાખો લોકો વિસ્થાપિત થયા છે.
જાન્યુઆરીમાં, યુએન શરણાર્થી એજન્સીએ ચેતવણી આપી હતી કે બગડતી પરિસ્થિતિને કારણે આ પ્રદેશના શરણાર્થીઓને પૂરતો ખોરાક, દવા અને શુધ્ધ પાણી મેળવવા માટે સંઘર્ષ કરવો પડી રહ્યો છે અને જો પરિસ્થિતિમાં સુધારો ન થાય તો તેઓ મૃત્યુના જોખમમાં છે. યુએનના સમાચાર અનુસાર, શરણાર્થીઓ પર પણ હુમલા થયા હતા. ફેબ્રુઆરીમાં, હજારો એરિટ્રિયનોને અફાર પ્રદેશમાં એક શિબિરમાંથી ભાગી જવાની ફરજ પડી હતી જ્યારે સશસ્ત્ર માણસોએ તેમનો સામાન ચોરી લીધો હતો અને ઘણાને મારી નાખ્યા હતા.
યુએન એજન્સીઓએ ઇથોપિયામાં આશ્રય લઈ રહેલા 750,000 થી વધુ લોકોને મદદ કરવા માટે ભંડોળ માટે તાત્કાલિક અપીલ કરી. UNHCR એ તેની વેબસાઈટ પર જણાવ્યું હતું કે વિશ્વભરમાં ઘર છોડીને ભાગી જવા માટે મજબૂર થયેલા લાખો લોકો માટે આવનારી શિયાળો ખૂબ જ પડકારજનક હશે. યુએન સેક્રેટરી-જનરલ એન્ટોનિયો ગુટેરેસે જૂનમાં કહ્યું હતું કે આપણું વિશ્વ આંતરિક વિસ્થાપનના સંકટનો સામનો કરી રહ્યું છે. સંઘર્ષ, આપત્તિઓ અને આબોહવા કટોકટી જેવી દુર્ઘટનાઓએ વિશ્વભરના લોકોને તેમના દેશોમાં વિસ્થાપિત કર્યા છે. પગલાં લેવાની જવાબદારી આપણા બધાની છે. વિસ્થાપિત લોકોની દુર્દશા માનવતાવાદી મુદ્દાથી ઘણી વધુ છે.
