ચાણસ્મા તાલુકાના ધિણોજથી વાયા ખલીપુર સુણસરને જોડતો 5 કિલોમીટર પાકો રોડ છેલ્લા કેટલાય સમયથી તૂટી જતાં વાહન ચાલકો પરેશાન છે. ધિણોજ અને સુણસર આજુબાજુ ઓએનજીસીના કૂવાઓ આવેલા છે જેના કારણે મોટા વાહનોની પણ અવરજવર રહે છે. આ રોડ સુણસરથી વડાવલી સુધી જાય છે જેના કારણે વડાવલીથી ધિણોજ વચ્ચે આવતા ગામો માટે મહેસાણા, સૌરાષ્ટ્ર કે બહુચરાજી જવા આવવા અતિ મહત્વનો માર્ગ છે.
આ રોડને રિપેરીંગ કરાવવા સુણસર, વડાવળી, મેરવાડા સહિતના અગ્રણીઓએ માર્ગ મકાન સહિત ઉચ્ચ વિભાગમાં રજૂઆતો કરાઈ છે પરંતુ માર્ગ-મકાન કહે છે કે અમારામાં આવતો નથી ઓએનજીસી દ્વારા બનાવાયો છે તો ઓએનજીસી કહે છે કે આ રોડ અમારામાં આવતો નથી તેમ કહી એકબીજા માથેથી ખભે કરી છેલ્લા છ માસથી આ રોડની હાલત દિવસે દિવસે ખરાબ થતી જાય છે.
મેરવાડાના નવીનભાઈ વ્યાસ અને વડાવલીના અગ્રણી ડાહ્યાભાઇ પટેલે જણાવ્યું કે વડાવલીથી વાયા સુણસર ખલિપુર ધિણોજને જોડતો આ રોડ અમારા માટે મહેસાણા જવા માટે અને સુણસર, ધારપુરી, મેરવાડા બાજુના 5થી 6 ગામના લોકોને બહુચરાજી કે સૌરાષ્ટ્રમાં કે ચાણસ્મા તરફ જવા માટે ટૂંકો રસ્તો છે જે તાત્કાલિક રીપેરીંગ કરાવવા માંગ છે.
