ક્રૂડ ઓઈલના ભાવમાં સતત ઘટાડો થઈ રહ્યો છે. ત્યારે ગતરોજ બ્રેન્ટ ક્રૂડ 0.8 ટકા ઘટીને 15 જુલાઈના નીચા સ્તરે 99.26 ડોલર પર હતું. મેન્યુફેક્ચરિંગમાં મંદી અને ઘટતી ઇંધણની માંગને કારણે રોકાણકારોએ સાવચેતી રાખી હતી, જેના કારણે ભાવમાં ઘટાડો જોવા મળ્યો હતો. તેલ ઉત્પાદકો આ સપ્તાહે પુરવઠો વધારવા કે ન વધારવા અંગે વિચારણા કરી રહ્યા છે. આ સપ્તાહમાં યુએસ ક્રૂડ બેન્ચમાર્ક પણ 92.42 ડોલર પર સ્થિર થયો હતો, જે 14મી જુલાઈ પછીના સૌથી નીચા સ્તરે આવ્યો હતો.
માર્ચમાં ક્રૂડ ઓઈલની કિંમત 113 ડોલર હતી જે હવે 100 ડોલરની આસપાસ ટ્રેડ થઈ રહી છે. વિશ્લેષકોએ જણાવ્યું હતું કે, કાચા તેલના ભાવમાં ઘટાડો ફેક્ટરી પ્રવૃત્તિના ડેટાને પગલે થયો હતો. ત્યારે વિશ્વની અર્થવ્યવસ્થા પણ મંદી તરફ આગળ વધી રહી છે. સોમવારે તેની ચિંતા વધી જ્યારે યુનાઇટેડ સ્ટેટ્સ, યુરોપ અને એશિયામાં થયેલા સર્વેમાં જુલાઇમાં ફેક્ટરી પ્રવૃત્તિ ઓછી રહી.
બુધવારે ઓપેકની બેઠક
બુધવારે રશિયા સાથે તેલ ઉત્પાદક દેશોના સંગઠન (OPEC) અને અન્ય દેશોની બેઠક યોજાવાની છે. જેમાં સપ્ટેમ્બરમાં તેલના ઉત્પાદન અંગે નિર્ણય લેવામાં આવશે. તમામની નજર આ નિર્ણય પર છે. સપ્ટેમ્બરમાં ઉત્પાદન સ્થિર રહેવાની ધારણા છે. જોકે, સાઉદી અરેબિયા તેલ ઉત્પાદન વધારવા માટે પ્રેરિત કરી શકે છે.
તેલના ભાવમાં ધીમે ધીમે થઈ રહ્યો છે ઘટાડો
વિશ્લેષકોએ જણાવ્યું હતું કે, ક્રૂડ ઓઈલના ભાવમાં વધારો ધીમે ધીમે ઓછો થઈ રહ્યો છે. પુરવઠા અને માંગની સ્થિતિ સ્પષ્ટ થયા પછી તેમાં વધુ ઘટાડો થઈ શકે છે. આ દરમિયાન અમેરિકાએ ચીન અને અન્ય કેટલીક કંપનીઓ પર પ્રતિબંધો લગાવ્યા છે. આ કંપનીઓએ પૂર્વ એશિયામાં ઈરાની તેલ અને પેટ્રોકેમિકલ ઉત્પાદનો વેચવામાં મદદ કરી.