હેન્ડ કેશ એપ માંથી લોન લેવું એક દંપતીને ભારે પડયું હતું. લોનનો હપ્તો સમયસર ન ભરી શકતા કંપનીએ વેપારીની પત્નીનો ફોટો મોર્ફ કરી નગ્ન સ્ત્રીના બોડી સાથે મેચ કરી વાઈરલ કરી દેતા દંપતી કફોડી સ્થિતિમાં મુકાઈ ગયું હતું. આ મામલે દંપતીએ સાઈબર ક્રાઈમમાં ફરિયાદ કરતા પોલીસે વિકૃત કૃત્ય કરનાર હેન્ડ કેશ એપના ઉઘરાણી ટીમના સભ્યને યુપીમાંથી ઝડપી લીધો હતો. આ અંગેની વિગત એવી છે કે અમદાવાદમાં પોશ વિસ્તારમાં રેડીમેડ ગાર્મેન્ટનો ધંધો કરતા યુવાનને લોકડાઉનમાં ધંધામાં નુકશાન જતા રૂપિયાની જરૂર પડી હતી પરંતુ તેનું સીબીલ યોગ્ય નહીં હોવાથી બેન્ક-ફાયનાન્સ કંપનીમાંથી લોન મળી શકે તેમ નહોતું. આથી વેપારીએ મોબાઈલ એપ પરથી હેન્ડ કેશ એપ પરથી પત્નીના નામે લોન લીધી હતી. હવે નિશ્ચીત સમયમાં હપ્તો ભરવામાં નિષ્ફળ જતા ગાળાગાળી થઈ હતી, એટલું જ નહીં. ઉઘરાણી વિભાગના કર્મચારીએ વેપારી દ્વારા આપવામાં આવેલ પત્નીના ફોટાને મોર્ફ કરીને તેના પર ન્યુડ મહિલાની બોડી સેટ કરી તે તસ્વીરો દંપતી ઉપરાંત તેમના પરિવારના સભ્યો અને મિત્રોને વાયરલ કરી દીધી હતી, જેથી ભાંગી પડેલા વેપારીએ સાઈબર ક્રાઈમમાં ફરિયાદ કરતા પોલીસે યુપીમાંથી આરોપીને ઝડપી લીધો હતો.