Sachin Tendulkar: આજે સચિન તેંડુલકરનો જન્મદિવસ છે. તે ટેસ્ટ અને વનડે ક્રિકેટનો બાદશાહ રહ્યો છે, સાથે જ તેણે T20 ક્રિકેટમાં પણ ઘણી ધૂમ મચાવી છે. સચિન તેંડુલકરે IPLની પ્રથમ 6 સીઝન રમી છે. તેણે IPLની તમામ મેચો માત્ર મુંબઈ ઈન્ડિયન્સ માટે જ રમી હતી. તેણે તેની IPL કારકિર્દીની 78 મેચોમાં 2334 રન બનાવ્યા હતા. આ દરમિયાન તેની બેટિંગ એવરેજ 34.84 અને સ્ટ્રાઈક રેટ 119.82 હતો. અહીં તેના નામે એક સદી અને 13 અડધી સદી છે. તે ઓરેન્જ કેપનો વિજેતા પણ રહી ચૂક્યો છે.
IPLમાં સચિન તેંડુલકરની સૌથી મોટી ઇનિંગ ચોથી સીઝનમાં આવી હતી. IPL 2011માં સચિને કોચી ટસ્કર્સ સામે 66 બોલમાં 100 રન બનાવ્યા હતા. સચિને આ સદી તેના મનપસંદ મેદાન વાનખેડે પર ફટકારી હતી. જો કે આ મેચમાં સચિનની ટીમ મુંબઈ ઈન્ડિયન્સને હારનો સામનો કરવો પડ્યો હતો. કોચી ટસ્કર્સે એક ઓવર બાકી રહીને લક્ષ્ય હાંસલ કર્યું હતું.
IPLમાં સચિનની બીજી યાદગાર ઈનિંગ વર્ષ 2010માં રાજસ્થાન રોયલ્સ સામે આવી હતી. અહીં મુંબઈ ઈન્ડિયન્સ પ્રથમ બેટિંગ કરતી વખતે નિયમિત અંતરે વિકેટ ગુમાવી રહી હતી પરંતુ સચિન એક છેડે ઊભો હતો. તેણે 59 બોલમાં 89 રન ફટકારીને મુંબઈને 174ના સ્કોર સુધી પહોંચાડ્યું. મુંબઈ આ મેચ 37 રને જીતવામાં સફળ રહ્યું હતું.
IPL 2012માં સચિને CSK સામે જબરદસ્ત જીત અપાવી હતી. મુંબઈ ઈન્ડિયન્સ 174 રનના લક્ષ્યનો પીછો કરી રહી હતી. અહીં સચિને 44 બોલમાં 74 રનની ધમાકેદાર ઈનિંગ રમીને મુંબઈ માટે જીતનો રસ્તો આસાન બનાવી દીધો હતો.
IPL 2010માં પણ સચિને CSK સામે મેચ વિનિંગ ઇનિંગ રમી હતી. પ્રથમ બેટિંગ કરતા CSKએ 180 રનનો સ્કોર બનાવ્યો હતો. જવાબમાં, સચિનની 52 બોલમાં 72 રનની સમજદાર ઈનિંગને કારણે મુંબઈએ એક ઓવર બાકી રહેતા મેચ જીતી લીધી હતી.
IPL 2010માં સચિને બીજી જોરદાર ઇનિંગ રમી હતી. તેણે કોલકાતા નાઈટ રાઈડર્સ સામેની મેચમાં 48 બોલમાં અણનમ 71 રન બનાવ્યા હતા. અહીં તેણે KKR દ્વારા આપવામાં આવેલા 156 રનના લક્ષ્યનો સરળતાથી પીછો કરી લીધો હતો.
