IPL 2023 ની શરૂઆતની મેચમાં ડિફેન્ડિંગ ચેમ્પિયન ગુજરાત ટાઇટન્સે 4 વખતની ચેમ્પિયન ચેન્નઈ સુપર કિંગ્સને 5 વિકેટથી હરાવ્યું હતું. એક નિયમ જેની આ સીઝનની શરૂઆત પહેલા સૌથી વધુ ચર્ચા થઈ હતી. તે ઈમ્પેક્ટ પ્લેયરનો નિયમ હતો અને પહેલી જ મેચમાં બંને ટીમો દ્વારા ઈમ્પેક્ટ પ્લેયરનો ઉપયોગ કરવામાં આવ્યો હતો. ચેન્નઈ સુપર કિંગ્સનો ફાસ્ટ બોલર તુષાર દેશપાંડે IPL 2023માં ઈમ્પેક્ટ પ્લેયર તરીકે ઉપયોગ થનાર પ્રથમ ખેલાડી બન્યો.
ચેન્નઈ સુપર કિંગ્સના કેપ્ટન એમએસ ધોનીએ પ્રથમ દાવના અંત બાદ આ નિર્ણય લીધો હતો. ધોનીએ અંબાતી રાયડુની જગ્યાએ તુષારને મેદાનમાં ઉતાર્યો હતો. ગુજરાત ટાઇટન્સ સામેની મેચમાં ટોસ બાદ જે પાંચ ખેલાડીઓનું નામ ‘ઈમ્પેક્ટ પ્લેયર’ તરીકે લેવામાં આવ્યું હતું તેમાં સુભ્રાંશુ સેનાપતિ, શેખ રાશિદ, તુષાર દેશપાંડે, અજિંક્ય રહાણે અને નિશાંત સિંધુના નામ સામેલ હતા. પરંતુ, ધોનીએ તુષારને તક આપી.
ધોનીએ IPL 2023ના પ્રથમ ઈમ્પેક્ટ પ્લેયર તરીકે તુષાર દેશપાંડેને મેદાનમાં ઉતાર્યો હતો. પરંતુ CSK કેપ્ટનનો આ દાવ ઉંધો પડ્યો હતો. તુષાર મેચમાં પોતાનો 4 ઓવરનો ક્વોટા પણ પૂરો કરી શક્યો નહોતો. તે સૌથી મોંઘો સાબિત થયો હતો. તેણે 3.2 ઓવરમાં 51 રન આપ્યા અને માત્ર 1 વિકેટ ઝડપી હતી. તુષારની આઈપીએલમાં આ 8મી મેચ હતી.
તુષાર દેશપાંડેને IPL 2022ની મેગા ઓક્શનમાં ચેન્નઈ સુપર કિંગ્સે 20 લાખની બેઝ પ્રાઈસમાં ખરીદ્યો હતો. તુષારે 2016માં ફર્સ્ટ ક્લાસમાં પ્રવેશ કર્યો હતો. આ પહેલા તે દિલ્હી કેપિટલ્સ માટે 5 મેચ રમ્યો હતો.
ઇમ્પેક્ટ પ્લેયરનો નિયમ શું છે?
IPL 2023 થી, BCCI એ લીગમાં ઈમ્પેક્ટ પ્લેયરનો નિયમ લાગુ કર્યો છે. તે ફૂટબોલ, બાસ્કેટબોલમાં અવેજી ખેલાડી તરીકે કામ કરશે. આ નિયમ હેઠળ મેચ દરમિયાન પ્લેઈંગ-ઈલેવનમાંથી કોઈપણ એક ખેલાડીની જગ્યાએ નવા ખેલાડીને ટીમમાં સામેલ કરી શકાય છે. આ માટે ટોસ પછી બંને ટીમોએ 5 અવેજી ખેલાડીઓને નામ આપવાના રહેશે. તેમાંથી ઈમ્પેક્ટ પ્લેયરની પસંદગી કરવામાં આવશે. બેટિંગ અને બોલિંગ ટીમ આ ખેલાડીનો ઉપયોગ મધ્ય મેચમાં કરી શકશે.