ભારત અને ઓસ્ટ્રેલિયા વચ્ચે ચાર ટેસ્ટ મેચની શ્રેણીની ચોથી અને અંતિમ મેચ અમદાવાદમાં રમાઈ રહી છે. આ મેચના પ્રથમ દિવસે ઓસ્ટ્રેલિયાની ટીમે પોતાનો દબદબો જાળવી રાખ્યો હતો અને 4 વિકેટના નુકસાન પર 255 રન બનાવ્યા હતા. આ દરમિયાન ટીમના ઓપનર ઉસ્માન ખ્વાજાએ 251 બોલમાં 104 રન બનાવ્યા હતા. તેની ઇનિંગ્સના દમ પર ઓસ્ટ્રેલિયન ટીમ પ્રથમ દિવસની રમત બાદ મજબૂત સ્થિતિમાં છે. અને ભારતીય ટીમ વિકેટની શોધમાં છે. ટીમ ઈન્ડિયા તરફથી આ મેચમાં કોઈ બોલર કંઈ ખાસ પ્રદર્શન કરી શક્યો નથી. અમદાવાદની સપાટ પીચ પર ભારતીય બોલરો વિકેટ માટે ખૂબ મહેનત કરતા જોવા મળ્યા. જોકે, આ મેચનો પ્રથમ દિવસ જ પૂરો થયો છે. ભારત પાસે આ મેચમાં હજુ ચાર દિવસ બાકી છે.
અમદાવાદના નરેન્દ્ર મોદી સ્ટેડિયમમાં ટોસ જીતીને બેટિંગ કરવા ઉતરેલી કાંગારૂ ટીમ તરફથી પીટર હેન્ડ્સકોમ્બ 17 રન, સ્ટીવ સ્મિથ 38 રન, માર્નસ લબુશેન 3 અને ટ્રેવિસ હેડ 32 રનમાં આઉટ થયા હતા. ભારત તરફથી મોહમ્મદ શમીએ બે વિકેટ ઝડપી હતી. જ્યારે રવિન્દ્ર જાડેજા અને રવિચંદ્રન અશ્વિનને એક-એક વિકેટ મળી હતી.
