સુરેન્દ્રનગર જિલ્લાના વઢવાણ ખોડુ ગામેની સીમવાડીમાં 360 કિલો દાડમની ચોરીનો બનાવ બન્યો હતો. જેમાં હળવદ પોલીસે પકડેલા ધ્રાંગધ્રાના અંકેવાળીયાના શખ્સની પૂછપરછમાં તેણે દાડમ રૂ.14 હજાર 760ના ખોડુની વાડીમાંથી ચોર્યાનું ખૂલ્યું હતું. આથી ખેતર માલિકને જાણ કરાતા તેઓએ જોરાવરનગર પોલીસ સ્ટેશને આ અંગે ફરિયાદ નોંધાવી હતી.
…વઢવાણ 80 ફૂટ રોડ પટેલ સોસાયટીના રહીશ પરેશ વ્રજલાલ મોટકાએ જોરાવરનગર પોલીસ સ્ટેશને દાડમ ચોરી અંગે ફરિયાદ નોંધાવી હતી. જે મુજબ વઢવાણના ખોડુ ગામની સીમમાં અંકેવાળીયા રોડ પર ખેતીની જમીનમાં દાડમનો બગીચો બનાવ્યો છે. તેઓ વાડીમાં હતા, ત્યારે દાડમ નીચે વિખેરાયેલા પડ્યાં હતા. તપાસ કરતા આસપાસના ઝાડ પરથી દાડમ તોડાયા હોવાનું જણાયું હતું. આથી તપાસ કરતા હતા, ત્યાં હળવદ પોલીસ સ્ટેશનથી ફોન આવ્યો હતો કે, ધ્રાંગધ્રાના અંકેવાળીયાના મુકેશ ગોરધનભાઇ હળવદીયા પાસેથી રોકડા રૂ.14 હજાર 460 હરિયાળી ફ્રૂટ માર્કેટનું બિલ મળ્યું છે. પૂછપરછમાં તેને ખોડુ ગામની સીમમાંથી વ્રજલાલ પટેલની વાડીમાંથી દાડમ 360 કિલો ચોર્યાનું જણાવ્યું હતું. જ્યારે ઝડપાયેલ શખ્સ વિરુદ્ધ ગુન્હો નોંધી વધુ તપાસ હાથ ધરી હતી.