ભારત અને ન્યુઝીલેન્ડ વચ્ચે વન્ડે સીરીઝની બીજી મેચ હેમિલ્ટનમાં રમાઈ હતી. પરંતુ વરસાદના કારણે આ મેચ પૂર્ણ થઈ શકી ન હતી અને રદ કરવામાં આવી હતી. ટોસ હાર્યા બાદ પ્રથમ બેટિંગ કરતા ભારતીય ટીમે 12.5 ઓવરમાં 89 રન બનાવ્યા હતા. આ દરમિયાન સૂર્યકુમાર યાદવ ઝડપી બેટિંગ કરી રહ્યો હતો. પરંતુ વરસાદે તેની જોરદાર ઇનિંગ્સને બરબાદ કરી દીધી હતી. શુભમન ગિલ 4 ચોગ્ગા અને એક છગ્ગાની મદદથી 45 રન બનાવીને અણનમ રહ્યો હતો.
આ મેચ માટે ન્યૂઝીલેન્ડે ટોસ જીતીને પ્રથમ બોલિંગ કરવાનો નિર્ણય કર્યો હતો. જ્યારે ભારતીય ટીમને પ્રથમ બેટિંગ માટે આમંત્રણ આપવામાં આવ્યું હતું. ટીમ ઈન્ડિયાએ મેચ રદ્દ થઈ ત્યાં સુધી 12.5 ઓવરમાં એક વિકેટના નુકસાન પર 89 રન બનાવ્યા હતા. ભારત તરફથી શિખર ધવન અને શુભમન ગિલ ઓપનિંગ કરવા આવ્યા હતા. ધવન 3 રન બનાવીને આઉટ થયો હતો. પરંતુ શુભમને મહત્વની ઇનિંગ રમી હતી. તેણે 42 બોલનો સામનો કરીને અણનમ 45 રન બનાવ્યા હતા. શુભમને 4 ચોગ્ગા અને 1 છગ્ગો ફટકાર્યો હતો.
3 નંબર પર બેટિંગ કરવા આવેલા સૂર્યકુમારે ઝડપી બેટિંગ કરી હતી. પણ વરસાદે મજા બગાડી નાખી. સૂર્યાએ 25 બોલનો સામનો કરીને અણનમ 34 રન બનાવ્યા હતા. તેની ઇનિંગમાં 3 સિક્સ અને 2 ફોરનો સમાવેશ થાય છે.
ન્યૂઝીલેન્ડ તરફથી મેટ હેનરીએ 4 ઓવરમાં 20 રન આપીને એક વિકેટ લીધી હતી. મિશેલ સેન્ટર ટીમ માટે ખૂબ મોંઘું સાબિત થયું. તેણે 1 ઓવરમાં 9 રન લૂંટ્યા. માઈકલ બ્રેસવેલે 2 ઓવરમાં 18 રન આપ્યા હતા. ટિમ સાઉથીએ 3 ઓવરમાં 12 રન આપ્યા હતા. જ્યારે લોકી ફર્ગ્યુસને 2.5 ઓવરમાં 24 રન આપ્યા હતા.
એક જ દિલ છે, કેટલી વાર જીતીશ સંજુ…
વાસ્તવમાં, હેમિલ્ટનના સેડન પાર્કમાં વરસાદને કારણે ઘણી વખત મેચમાં વિક્ષેપ પડ્યો હતો.તે દરમિયાન, સતત તેજ પવન અને વરસાદને કારણે ગ્રાઉન્ડ સ્ટાફને કવર લાવવા અને ખસેડવા પડ્યા. મેચની શરૂઆત પહેલા ખેલાડીઓ મેદાન પર પ્રેક્ટિસ કરી રહ્યા હતા ત્યારે વરસાદ શરૂ થયો અને ગ્રાઉન્ડ સ્ટાફ કવર લઈને દોડવા લાગ્યો હતો. એટલામાં જ પવન ખૂબ જ જોરદાર ફૂંકાયો અને કવર કાબૂ બહાર જવા લાગ્યા. ત્યારે અચાનક સંજુ સેમસન આવે છે અને એક બાજુથી કવર પકડીને ગ્રાઉન્ડ સ્ટાફની મદદ કરે છે.
સંજુ સેમસનના આ સ્ટેપથી તેણે ફરી એકવાર સોશિયલ મીડિયા પર બધાના દિલ જીતી લીધા છે. તે IPLમાં રાજસ્થાન રોયલ્સનો કેપ્ટન છે અને તેની ફ્રેન્ચાઈઝીએ તેમના કેપ્ટનની આ હૃદયદ્રાવક ઘટનાનો વીડિયો શેર કર્યો છે. સંજુના આ પગલાની પ્રશંસા કરતા બધાએ આ વીડિયો પર કોમેન્ટ કરી. તે જ સમયે, ઘણા લોકોએ તેને ટીમમાં ન લેવાનો મુદ્દો ઉઠાવ્યો અને બીસીસીઆઈને ઘેરી લિધી છે. આ વીડિયો સોશિયલ મીડિયા પર જોરદાર વાયરલ થઈ રહ્યો છે.