દિલ્હી વક્ફ બોર્ડની ભરતીમાં કથિત ભ્રષ્ટાચારના સંદર્ભમાં દિલ્હીની એન્ટી કરપ્શન બ્રાન્ચ (ACB) એ શુક્રવારે આમ આદમી પાર્ટીના ધારાસભ્ય અમાનતુલ્લાહ ખાનના ઘર સહિત પાંચ સ્થળોએ દરોડા પાડ્યા હતા. આ પછી ધારાસભ્ય અમાનતુલ્લાહ ખાનની ધરપકડ કરવામાં આવી હતી.
દરોડામાં એક લાઇસન્સ વગરની પિસ્તોલ, અન્ય ગેરકાયદેસર હથિયાર, કારતુસ અને 24 લાખ રૂપિયાની રોકડ જપ્ત કરવામાં આવી હતી. દરોડા દરમિયાન તપાસ ટીમ પર હુમલાનો મામલો પણ સામે આવ્યો છે. ACBએ દિલ્હી વક્ફ બોર્ડમાં કરવામાં આવેલા ભરતીમાં કથિત ભ્રષ્ટાચારના કેસમાં પૂછપરછ માટે, ઓખલા વિસ્તારના ધારાસભ્ય અમાનતુલ્લાહ ખાનને ભ્રષ્ટાચાર નિવારણ અધિનિયમ હેઠળ 2020માં નોંધાયેલા કેસમાં નોટિસ જારી કરીને શુક્રવારે બપોરે 12 વાગ્યે પૂછપરછ માટે બોલાવવામાં આવ્યા હતા. અમાનતુલ્લાહ ખાન દિલ્હી વક્ફ બોર્ડના અધ્યક્ષ છે.
એસીબીના દરોડામાં અમાનતુલ્લાહ ખાનના બિઝનેસ પાર્ટનર હામિદ અલીના ઘરેથી એક લાઇસન્સ વગરની પિસ્તોલ મળી આવી હતી. જામિયા, ઓખલા અને ગફૂર નગર વિસ્તારમાં પાડવામાં આવેલા દરોડા દરમિયાન લગભગ 12 લાખ રૂપિયાની રોકડ મળી આવી હતી. આ પછી દિલ્હીની એન્ટી કરપ્શન બ્રાન્ચે અમાનતુલ્લા ખાનની ધરપકડ કરી હતી.
દિલ્હી વક્ફ બોર્ડના અધ્યક્ષ ખાને પણ નોટિસ વિશે ટ્વીટ કર્યું હતું અને લખ્યું હતું કે તેમને સમન્સ મોકલવામાં આવ્યા છે કારણ કે તેમણે વક્ફ બોર્ડની નવી ઓફિસ બનાવી છે. આ મામલામાં દિલ્હી વક્ફ બોર્ડના અધ્યક્ષ પદેથી ખાનને હટાવવા માટે એસીબીએ ઉપરાજ્યપાલ સચિવાલયને એક અરજી પણ લખી હતી. એસીબીએ દાવો કર્યો હતો કે ખાને કેસના સાક્ષીઓને ડરાવીને તપાસને પ્રભાવિત કરવાનો પ્રયાસ કર્યો હતો.
કેસ ખોટો, બદનક્ષી માટે ધરપકડઃ AAP
આમ આદમી પાર્ટીએ ધારાસભ્ય અમાનતુલ્લાહ ખાનની ધરપકડને પાયાવિહોણી અને સંપૂર્ણપણે નકલી ગણાવી છે. AAPએ કહ્યું કે દરોડા દરમિયાન ખાનના નિવાસસ્થાન અથવા ઓફિસમાંથી કંઈ મળ્યું નથી. ધારાસભ્યને ખોટા કેસમાં ફસાવીને આમ આદમી પાર્ટીને બદનામ કરવાનું આ નવું ષડયંત્ર છે.