બારડોલી : બારડોલી ટાઉન પોલીસ મથક વિસ્તારના ઇસરોલી ગામની મંગલમ સોસાયટીમાં ચોરોએ બે બંધ ઘરોને નિશાન બનાવ્યા હતા. જો કે નજીવી રકમની ચોરી થઈ હોવાનું જાણવા મળ્યું છે. સોસાયટીના CCTV કૅમેરામાં ત્રણ જેટલા ચોર નજરે પડી રહ્યા છે.
બારડોલી શહેર અને તાલુકામાં ચોરીની ઘટના અટકવાનું નામ નથી લેતી. બારડોલી તાલુકાના ઇસરોલી ગામની સીમમાં આવેલી મંગલમ સોસાયટીની દીવાલ કૂદી ત્રણ જેતલ ચોર સોસાયટીમાં પ્રવેશ્યા હતા અને સોસાયટીના બંધ મકાન નંબર 70 અને 71નું તાળું તોડી અંદર પ્રવેશ કર્યો હતો. ચોરોએ તમામ સામાન વેરવિખેર કરી નાખ્યો હતો. ચોરી કરતાં પહેલા તસ્કરોએ આજુબાજુના પાંચ મકાનોના દરવાજાના નકુચા બહારથી બંધ કરી દીધા હતા. તસ્કરોને બંને મકાનોમાંથી કોઈ કીમતી સામાન હાથ લાગ્યો ન હતો. માત્ર થોડી પરચુરણ રકમથી સંતોષ માનવો પડ્યો હતો. સોસાયટીમાં ચોરોએ બે કલાકત સુધી આંટા ફેરા માર્યા હતા. જે CCTV માં કેદ થયું હતું. બીજી તરફ 76 નંબરના મકાન બહાર પાર્ક કરેલી મોટર સાયકલ ચોરી કરવાનો પ્રયાસ કર્યો હતો પરંતુ નજીકની સોસાયટીનો વોચમેન મંગલમ સોસાયટીમાં આવતા તસ્કરો નાસી છૂટ્યા હતા. સોસાયટીના રહીશોના જણાવ્યા અનુસાર થોડા સમય પૂર્વે પણ આ સોસાયટીમાં આવેલી દુકાનમાં ચોરીનો પ્રયાસ દરમ્યાન ચોરોએ પથ્થરમારો કર્યો હતો. જેમાં એક યુવકને પથ્થર વાગતા હોસ્પિટલમાં દાખલ કરવાની ફરજ પડી હતી.
